Hi ku simekiwa
ka Nkwama wa Nseketelo wa Mavhengele ya Swiphaza (SSSF) wa R500 wa timiliyoni, mfumo wu lulamerile ku pfuna van’wamabindzu lava va lavaka ku simeka masungulo, ku ndlandlamuxa mabindzu ya vona, na ku kuma swikili swa mabindzu swa nkoka ku antswisa matirhelo ya mabindzu ya vona.
Leswi swi vuriwile hi Holobye wa Nhluvukiso wa Mabindzu Lamatsongo, Stella Ndabeni.
Hi pfhumba ra sweswinyana ro va na mavhengele ya swiphaza ya tsarisiwa, mfumo wu amukerile 87 407 wa swikombelo naswona eka leswi, ntsengo wa 53% wu huma eka mavhengele ya swiphaza lama nga ehansi ka vun’wini bya vanhu va Afrika-Dzonga.
“Ku tinyiketela ka hina eka nkwama lowu i ku seketela lava va yingiseke xikombelo xa Phuresidente ku tsarisa mavhengele ya vona ya swiphaza. Tanihi Ndzawulo ya Nhluvukiso wa Mabindzu Lamatsongo, hi nga ku pfuna loko u ri na miehleketo naswona u lava ku sungula bindzu.
"Hi na mihlangano leyi pfunaka mabindzu lamantshwa na lama ha sungulaka. Hi nga ku pfuna kusuka eka ku va muxavisi loyi a nga riki wa xivumbeko kuya eka muxavisi wa ximfumo, ku sungula vhengele ra xiphaza na ku va na holisele kumbe chanele hinkwayo yo hangalasa. Hi ta tirhisana na n'wina ku mi pfuna ku hundzula swilo," ku vula Holobye Ndabeni.
Nkwama wa nseketelo wu sunguriwile sweswinyana eSoweto, eGauteng ku seketela mavhengele yo olova lama nga ehansi ka vun’wini bya vanhu va Afrika-Dzonga, ku katsa na mavhengele ya swiphaza, ku engetela ku nghenelela ka vona eka sekitara ya mabindzu ya vuxavisi bya le malokixini na le makaya.
Nkwama lowu wu lawuriwa hi ku hlanganela hi Nkwama wa Matimba wa Rixaka (NEF) na Ejensi ya Timali ya Nhluvukiso wa Mabindzu Lamatsongo (SEFDA), nkwama wu nyika nseketelo wa nkoka wa swa timali na lowu nga riki wa timali eka mabindzu ya le malokixini, ku katsa na switolo swo olova swa vaaki na mavhengele ya swiphaza.
Nkwama lowu nyika tinxaka to hambana ta nseketelo, ku katsa na ku xava ko sungula ka xitoko hi ku tirhisa vatirhisani va tichanele to rhumela, ku ndlandlamuxiwa ka switirhisiwakulu swa miako, tisisiteme, vugwitsirisi, ku veka etixelufini na vuhlayiseki, xikan’we na minongoloko ya vuleteri, leyi katsaka tidivhayisi ta tindhawu to xavisa, swikili swa mabindzu, vutivi bya xidijitali, rihanyo ra swikweleti, vuhlayiseki bya swakudya na ku landzelerisa ka bindzu.
“Nkwama lowu wu ta lulamisa vubihi bya tiikhonomi ta xikalo hi ku hlanganisa mavhengele ya swiphaza na mitlawa yo xava ku hlengeleta na ku xava hi xitalo; ku aka vuswikoti bya bindzu hi ku tirhisa vuleteri na nseketelo ku antswisa matirhelo ya switolo; na ku ndlandlamuxa mphikizano wa makete ku pfuna mavhengele ya swiphaza ku phikizana na vaxavisi lavakulu."
Nkwama lowu wu ta hangalasiwa etikweni hinkwaro ku khumba mavhengele ya swiphaza eka malokixi hinkwawo lamakulu, xikan’we na le tindhawini ta le makaya.
Holobye u vule leswaku mfumo wu ringeta ku tirhisana na van’wamabindzu ku veka swivandlanene swa mphakelo eka mabindzu ya le malokixini na ya le tindhawini ta le makaya.
“Ku fikelela leswi, hi ta tirhisa switirho swin’wana swo fana na Nongoloko wa Nseketelo wa Vumaki bya Mabindzu Lamatsongo, Minongoloko ya Vun’wamabindzu bya le Malokisini na le Matikoxikaya (TREP), Nongoloko wa Nhluvukiso wa Mabindzu lama nga riki ya Ximfumo na Lamatsongo (IMEDP), Mpfuneto wa Nhundzu, na Ndhawu ya hina Switirhisiwakulu swa Ikhonomi leswi Avelaniwaka.
“Minongoloko leyi hi ku landzelelana yi na vuswikoti byo koka rinoko ra timasipala, sekitara leyi nga riki ya mfumo, mihlangano ya mabindzu na vaxavisi lava nga riki va ximfumo, na vakhomaxiave van’wana ku tirha swin’we eku hoxeni ka switirhisiwa swa vona, vutivi na swipfuno ku seketela mikhulukelano ya mphakelo ya laha kaya leyintshwa na tinetiweke to hangalasa ta mavhengele ya swiphaza.
DSBD Connect
Ndzawulo yi thorile 
52 wa Vaofisiri va Vulawuri bya Mabindzu eka swifundzakulu hinkwaswo na timasipalakulu ku seketela ku tsarisiwa ka mabindzu hi ku tirhisa sisiteme ya DSBD Connect.
DSBD Connect i pulatifomo leyi nga ta tirhisiwa ku khomisana kumbe ku hlanganisa mabindzu lamatsongo ku khomisana na/kumbe ku tirhisana eka phurojeke yo karhi.
Leswi swi nga va mabindzu lama nga endzeni ka tiindasitiri leti fanaka kumbe tiindasitiri to hambana kambe ti dinganaka eka swikili swo kongoma kumbe mithwaso.
Pulatifomo leyi yi ta hlanganisa mabindzu lamatsongo lama nga endzeni ka ndhawu yin’we ya ntivomisava, ku tsakela, na vuswikoti.
“Hambileswi swi nga swa nkoka, mavhengele ya swiphaza ya langutane na mitlhontlho yo hlaya, ku katsa na ku fikelela xumakulu, ku vilela hi nsirhelelo, na mphikizano kusuka eka vaxavisi va ximfumo, ku fana na switolo leswikulu swa vuxavisi na switolo leswikulu leswi nghenelaka timakete ta swona.
"Mavhengele ya swiphaza lama nga ehansi ka vulawuri bya Afrika-Dzonga na wona ya langutana na mphikizano lowukulu kusuka eka mavhengele ya swiphaza lama fambisiwaka hi matiko mambe, lama tirhisaka mikhulukelano ya mphakelo leyi lulamisiweke swinene ku kuma mphikizano."
“Hikokwalaho, ndzi lava ku mi khutaza ku tirhisana na ku simeka mabindzunhlanganelo leswaku mi ta kota ku tirhisa swipfuno, vutivi, na ku tirhisana eka tiphurojeke, ku avelana maendlelo lamanene,” ku vula Holobye Ndabeni. - SAnews.gov.za
Ku fikelela mali:
Ku fikelela mali, vaendli va swikombelo va dinga ku endla xikombelo eka Nkwama wa Havexerisamatimba wa Rixaka (NEF) na Ejensi ya Timali ya Nhluvukiso wa Mabindzu Lamatsongo (SEFDA) hi ku tirhisa endlelo ra xikombelo leri vekiweke leri hlamuseriweke eka webusayiti ya nhlangano lowu faneleke.
Webusayiti leyi landzelaka yi nga tirhisiwa ku endla xikombelo xa mali: Nkwama wa Nseketelo wa Mavhengele ya Swiphaza - www.spazashopfund.co.za
NEF - www.nefcorp.co.za
SEDFA - https://systems.sefa.org.za/SMMEPortal/
Vuxokoxoko bya vutihlanganisi bya senthara ya riqingho ya Nkwama wa Nseketelo wa Mavhengele ya Swiphaza i 011 305 8080 kumbe hi ku tirhisa imeyili: Spazafund@nefcorp.co.za
Vuxokoxoko bya vutihlanganisi bya senthara ya riqingho ya NEF i 0861 843633, Senthara ya tiqingho ya SEDFA: 012 748 9600 kumbe imeyili yi nga rhumeriwa eka helpline@sefa.org.za
Email
Facebook
Twitter
WhatsApp