Nowalaza a havexerisa matimba eka miganga hi ku tirhisa thekinoloji

Leswi swi sunguleke tanihi bindzu ro dizayina swifaniso leritsongo eKapa-N’walungu swi kurile ku va khamphani ya switshunxo swa xidijitali leyi cincacincaka leyi nga na mfungho wa tiko na wa matiko ya misava.

Sayda Communication, leyi simekiweke hi Tsholofelo Nowalaza hi Ndzati 2020, i vumbhoni bya leswaku hi xivono, ku navela, na ku phikelela, hambi ku ri miganga ya le kule swinene yi nga va xiphemu xa nhluvukiso wa xidijitali.

 “Ekusunguleni a ku ri khamphani ya dizayini ya swifaniso ntsena kambe endzhaku ka nkarhi yi engeterile vukorhokeri byo fana na  Nhluvukiso wa Vuswikoti & Vuleteri swa 4IR, Ku Tirhisa na Vuleteri bya Tisisiteme ta Xidijitali, ntivotirhoboto na ntivonkhodo eka vadyondzi va le ka swikolo swa sekondari xikan’we na vutekaswifaniso, vutekativhidiyo na vutekaswifaniso hi tidironi,” ku vula Nowalaza.

Riendzo ra yena eka thekinoloji a ri nga olovangi.

Loko a nga si sungula Sayda Communication, Nowalaza u tirhile tanihi makhanikhi wa sevhisi eka sekitara ya tiindasitiri.

“Ndzi tshike ntirho hikuva a ndzi nga tiphini hi wona. Ndzi dyondze vutshila na vumaki eKholichi ya Dyondzo na Vuleteri bya Xithekiniki na Mitirho ya Mavoko ya Sedibeng loko ndzi ri karhi ndzi dyondza dizayini ya tiwebusayiti ya nkarhinyana eYunivhesiti ya Free State.

 “Ndzi tshike hikuva ndzi lo twa ntsena ku nga ha ri na vuxaka eka nyiko leyi a yi ndzi rhendzerile.”

Swikili swa yena swa thekinoloji swi andzile endzhaku ko heta khoso ya nhluvukiso wa sofuwere eka HyperionDev.

Nowalaza u vule leswaku loko khamphani ya yena yi ri karhi yi kula, u engetele vukorhokeri byin’wana hikuva sweswi u kotile ku nyika khoso ya nhluvukiso wa sofuwere endzhaku ko nghenela HyperionDev.

Sayda Communication sweswi yi tirhela titlilayente ta laha kaya na ta matiko ya misava, naswona sweswinyana yi simeke nongoloko wa ntivotirhoboto na ntivonkhodo eka vadyondzi va tigiredi ta 4 kufika eka 11.

 “Sweswinyana hi sungule ku endla ntivotirhoboto laha hi dyondzisaka ntivonkhodo eka vana lava nga eka tigiredi ta le xikarhi ka 4 na 11.”

Kambe riendzo leri ri vile na swiphiqo. Khamphani yi lwisana na ku pfumaleka ka vatirhi va swikili exifundzeni.

"Loko riendzo ri ri karhi ri nga olovi, hikuva hi pfumala vatirhi hikuva a hi vanhu vo tala lava hi rhendzeleke lava nga na swikili leswi hi swi dingaka... entiyisweni, xexo hi xona xivangelo lexi hi sunguleke ku endla ndzetelo wa swikili. Hi swi vonile leswaku ku na vanhu vo tala lava nga ekusuhi lava nga na vuswikoti byo kula kambe va nga ri na ku paluxiwa."

Ku nyikiwa ka timali i xihinga xin’wana, ngopfungopfu eka migingiriko ya ndzetelo wa vaaki.

"Hi dinga ntsena swipfuno, ngopfungopfu eka ntivotirhoboto na ntivokhodo hikuva vana lava hi va dyondzisaka, vatswari va vona a va na vuswikoti byo va sayinela. Loko hi nga kuma munhu loyi a nga hi pfunaka hi ku vula leswaku u ta hakela ntsengo lowu kutani hi nga ya emahlweni hi va dyondzisa."

Sayda yi tirha kusuka ePostmasburg, yi na tihofisi eKuruman na Sandton. Hambiswiritano, ku nghena ka inthanete loku nga nyawuriki eKapa-N’walungu i xihinga lexikulu.

 “Hi Kapa-N’walungu, ntlhontlho lowukulu i mfikelelo wa inthanete. Mikarhi yin’wana u lava ku ya eka tindhawu leti u swi tivaka leswaku va dinga xikili lexi kumbe vukorhokeri lebyi, a wu nge swi koti hikuva a wu nge swi koti ku tirha.”

Hambiswiritano, ntirhokulu wu ya emahlweni. “Naswona kufikela sweswi, riendzo hi leri enerisaka.” 

Ku tihlanganisa na Sayda Communications, rhumela imeyili eka Tsholofelo eka Tsholo@saydacommunications.co.za, 
endzela www.saydacommunications.co.za, kumbe u bela riqingho eka 079 148 6629.