Phuresidente Ramaphosa a thola Phurofesa Mariana Mazzucato eka vuthu ra ntirho ra G20

Phuresidente Cyril Ramaphosa u thorile Phurofesa Mariana Mazzucato tanihi Mutivinkulu wa swa Xithekiniki eka Vuphuresidente bya G20 bya Afrika-Dzonga na Muyimeri wa yena wa Phuresidente wo Hlawuleka eka Vuthu ra Ntirho ra 1: Ku Kula ka Ikhonomi loku Katsaka Hinkwavo, Ku Endliwa ka Tiindasitiri, Mitirho, na Nkandzingano lowu Hungutiweke.

Phurofesa Mazzucato u ta tlhela a hoxa xandla eka Vuthu ra Ntirho ra 3: Vutlhari bya Tikhomphyutara, na Vumaki bya Nhluvukiso lowu Yisekaka Emahlweni. 

U ta tlhela a seketela Ndlela ya Sherpa: Ntlawa wo Tirha wa Mabindzu na Vuvekisi, na Ntlawa wo Tirha wa Timali lowu Yisekaka Emahlweni wa Ndlela ya Timali, na Ntlawa wo Tirha wa Vupulani bya swa Timali bya Matiko ya Misava.

Phurofesa Mazzucato i xirho xa Huvo ya Vutsundzuxi bya Ikhonomi (PEAC) ya Phuresidente Ramaphosa kusukela hi 2019, a tsundzuxa eka tindhawu to fana na qhinga ra tiindasitiri ta rihlaza, vuswikoti bya mfumo, na mpfuxeto wa  mabindzu ya mfumo.

Hi 2024, u vile mutshamaxitulukulobye wa Ntlawa wa Vativinkulu va Vuthu ra Ntirho ra G20 ra Brazil eka Nhlengeleto wa Misava Hinkwayo wo Lwisana na ku Cinca ka Tlilayimete (TF-CLIMA).

Ku thoriwa loku ku seketela ku tinyiketela ka Afrika-Dzonga ku tirhisa vurhangeri bya yona eka G20 ku vumba ikhonomi ya misava hinkwayo leyi katsaka hinkwavo na ku va leyi yisekaka emahlweni.

Phurofesa Mazzucato, loyi a tivekaka emisaveni hinkwayo hi ntirho wa yena eka ku ehleketa hi vuntshwa hi mfumo, ku kula ka rihlaza, vutumbuluxi lebyi kongomisiweke eka vurhumiwa na ku tumbuluxiwa ka nkoka wa vaaki, u tisa vuswikoti bya nkoka eka ku yisa emahlweni swikongomelo swa Afrika-Dzonga eka vumaki bya tiindasitiri ta rihlaza, ku kula loku katsaka hinkwavo, na ku cinca ka xivumbeko xa nkarhi wo leha.

Ehansi ka vurhangeri bya Phuresidente Ramaphosa na nkongomelo wa G20 ya “Nkhomano. Ndzingano. Vuyisekamahlweni.”, Afrika-Dzonga yi kongomisa ku rhangela mivulavurisano ya misava hinkwayo eka timhaka leti ta nkoka, ku seketela tipholisi leti kurisaka nhluvukiso wa ikhonomi lowu tiyeke, ngopfungopfu ematikweni lama hluvukaka.

Vuphuresidente bya Afrika-Dzonga bya G20 byi tiyimiserile ku yisa emahlweni rimba ra ikhonomi ya misava hinkwayo leri seketelaka ku kula ka rihlaza, ku tiyisela ka ikhonomi, na ku ringana ka vaaki.

Tanihileswi lembe ra 2025 ri funghaka leswi Phuresidente Ramaphosa, kun’we na Phuresidente Lula da Silva wa Brazil na Holobyenkulu Sánchez wa Spain, va swi vitaneke “lembe ra nkoka eka vutekaxiave bya mifumo ya matikonyingi” hi tinhleneletanokulu tinharhu ta misava hinkwayo – Samiti ya G20 eJoni, Khomferense ya Ku Nyika Timali eka Nhluvukiso eSeville na COP30 eBelém. 

Vuxokoxoko lebyi byi nyikiwile hi Hofisi ya Phuresidente ya Afrika-Dzonga.