Ezokuthuthukiswa Komphakathi kwandisa izinsizakalo

Ukuvikela nokweseka izingane kusalokhu kungommongo womgomo woMnyango Wezokuthuthukiswa Komphakathi, kusho uNgqongqoshe uSisisi Tolashe eKomidini Lezokuthuthukiswa Komphakathi muva nje.

Umnyango wethule uMbiko wawo Wonyaka wezi-2024/25, ngemuva kweseshini ephinde yabonisa isithangami lapho uMcwaningi-mabhuku Jikelele waseNingizimu Afrika (i-AGSA) ebeke kafushane ngemiphumela yocwaningo-mabhuku lomnyango kanye nezinhlangano zawo - i-Ejensi Yezezimpesheni eNingizimu Afrika (i-SASSA) kanye ne-Ejensi Yezokuthuthukiswa Kukazwelonke (i-NDA).

UNgqongqoshe ubike inqubekela-phambili ekulweni noDlame Olubhekiswe Kwabobulili Obuthile Nokubulawa Kwabesifazane (i-GBVF), ngokugqamisa ukwethulwa koMthethosivivinywa Wezinsizakalo Zokusekela Izisulu kwiKhabhinethi. Lo Mthethosivivinywa ubhekana negebe lezomthetho elikhona futhi uqinisa ukuhlinzekwa kwezindawo zokukhosela kanye nezinsizakalo zokusekela izisulu. 

“Siguqule ukusebenza kahle kweSikhungo Sokulawula Udlame Olubhekiswe Kwabobulili Obuthile futhi siyaqhubeka nokuqinisa ukubheka nokuqapha izinsizakalo ezifundazweni,” kusho yena, enezela ngokuthi umnyango uyaqhubeka nokuqapha ukuqaliswa kweZifundo Zomhlaba Zokwelapha ezikhungweni zokwelapha ezweni lonke.

UNgqongqoshe uTolashe uphinde wagqamisa ukukhula kohlelo losizo lomphakathi, manje olufinyelela kubantu abangaphezu kwezigidi ezingama-28 abafanelekile. Lokhu kufaka phakathi izingane ezingaphezu kwezigidi eziyi-13.1 ezihlomula kwiSibonelelo Sabantwana kanye nabantu abadala ababalelwa ezigidini ezi-4.1 abathola iSibonelelo Sokuguga.  

“Ukufeza isithembiso sokuqinisekisa ukuthi akekho oshiywa ngemuva kudinga ukuthi sihlale sigxile ekubhekaneni nobumpofu ezinganeni nakubantu abadala manje nasesikhathini esizayo,” kugcizelela yena.

Ukwenza kangcono kwimiphumela yocwaningo-mabhuku nasekubuseni

UMnyango Wezokuthuthukiswa Komphakathi uthole isitatimende socwaningo-mabhuku lwezimali olube namaphutha ngowezi-2024/25, kanti i-SASSA ithole isitatimende socwaningo-mabhuku lwezimali olungenamaphutha.

UNgqongqoshe uTolashe uncome le nqubekela-phambili kodwa wanxusa i-ejensi ukuthi ilwele ukwenza kangcono.

“Ngizojabula kakhulu ukubona i-SASSA iqhubekela phambili kucwaningo-mabhuku olungenamaphutha kunyakamali olandelayo. Ngiyalele umphathi omkhulu ukuthi abhekane ngokucophelela nayo yonke imiphumela yoMcwaningi-mabhuku Jikelele futhi anikeze imibiko yenqubekela-phambili ehhovisi lami njalo,” kusho yena.

Uphinde wakhuluma ngodaba oluqhubekayo phakathi kwePostbank ne-SASSA oseludonse amahlo omphakathi, waphawula nokuthi uMongameli lolu daba uludlulisele kwiKomidi Elihlangene LoNgqongqoshe (i-IMC) ukuze luxazululwe.

“Sizokwazisa leli komidi ngezingxoxo nezinqumo ze-IMC ngesikhathi esifanele,” kusho uNgqongqoshe. 

Uphinde wagcizelela ukuthi ukuqedwa kweSivumelwano Sokusebenzisana phakathi kwe-SASSA nePostbank akuthinti ilungelo labahlomula izibonelelo ukuthi bathole izibonelelo zabo, nokuthi zonke izinyathelo ezidingekayo ziyathathwa ukuqinisekisa ukulandelwa kwezidingo zomthetho nezokuphathwa kwezezimali.  – SAnews.gov.za

Ngabe bewazi?

IQualified audit: UMcwaningi-mabhuku Jikelele uthole izinkinga ezithile ngesikhathi ecwaninga.

I-Unqualified audit: UMcwaningi-mabhuku Jikelele akatholanga izinkinga ezinkulu, umbiko awunazinkinga.