IKwaZulu-Natali Ibheke Utshalomali Lwezigidigidi Ezingama-R95

Uhulumeni waKwaZulu-Natali uzimisele ukuheha utshalomali lwezigidigidi ezingama-R95 esifundazweni ngesikhathi seNgqungquthela Yotshalomali yaKwaZulu-Natali yowezi-2025 (i-KZNIC 2025) kule nyanga.

INgqungquthela Yotshalomali izobanjwa kusukela mhla zingama-22 kuya zingama-24 kuMfumfu wezi-2025 e-Inkosi Albert Luthuli International Convention Centre eThekwini.

Ngokuhlelwa yiTrade & Investment KwaZulu-Natal (i-TIKZN), inkundla yotshalomali ehamba phambili kuhloswe ngayo ukubeka lesi sifundazwe njengendawo ehamba phambili kwezohwebo notshalomali e-Afrika. Njengoba bezibekele isamba esikhulu sezigidigidi ezingama-R95 ezithembisweni ezintsha, ingqungquthela yakulo nyaka izogxila kakhulu ekucijiseni amabhizinisi amancane, aphakathi nendawo namancanyana (ama-SMME), ukuthuthukisa ukubamba iqhaza okubandakanya wonke umuntu, kanye nokuhambisana nesikhundla seNingizimu Afrika soBumongameli beQembu Lamazwe angamashumi amabili-20 (i-G20).

UNgqongqoshe Wezokuthuthukiswa Komnotho, Ezokuvakasha kanye Nezemvelo, uMfundisi, uMusa Zondi, uthe ingqungquthela inombono wokuletha izinguquko. 

“Ingqungquthela yakulo nyaka ayikho mayelana nezithembiso nje kuphela, imayelana nokwakha iKwaZulu-Natali eqinile, ebandakanya wonke umuntu, futhi encintisanayo emhlabeni wonke. Leli nani abazibekele lona lotshalomali oluyizigidigidi ezingama-R95 limele imisebenzi, amathuba, kanye noguquko kubantu bakithi,” kusho yena.

UZondi ugcizelele ukuthi ukubandakanya wonke umuntu kungummongo wohlelo. 

“Sizimisele ukuqinisekisa ukuthi amathuba avuliwe kwi-KZNIC 2025 awahlomulisi nje kuphela abatshalizimali abathuthukile kodwa nama-SMME, oSozimboni Abamnyama, osomabhizinisi besifazane kanye nentsha. Laba bangabaqhubi bomnotho wethu, futhi sizimisele ukubasungulela indawo yokuthi bachume kanye nabasebenzisana nabo emhlabeni wonke,” kuchaza yena.

UNgqongqoshe uxhumanise umhlangano wesifundazwe nomzuzu wobuholi bomhlaba wonke beNingizimu Afrika. “Isikhundla sethu soBumongameli be-G20 ngaphansi kwengqikithi ethi ‘Ubumbano, Ukulingana, Ukusimama’ siyinkombandlela yengqungquthela yakulo nyaka. IKwaZulu-Natali iyazamukela lezi zimiso ngokuqinisa ubumbano nalabo esisebenzisana nabo, ikhuthaza ukulingana ngokubamba iqhaza okubandakanya wonke umuntu, kanye nokuqhuba ukusimama ngokubeka phambili utshalomali olugqugquzela ukucoceka kwemvelo nolufanele ikusasa,” kwengeza yena.

UZondi uthe le ngqungquthela iwubufakazi bokuthi isifundazwe sikwazi ukuguqula izithembiso zibe nomthelela obonakalayo. “I-KwaZulu-Natali iyazifeza izithembiso zayo, futhi ngale ngqungquthela, sivula kakhulu iminyango yethu kubatshalizimali abafuna ukuba yingxenye yesifundazwe esikhulayo,” ephawula.

UNgqongqoshe uphawulile ngokuthi engqungqutheleni yangonyaka odlule kwatholwa izithembiso ezigidigidi ezingama-R85.2, nemiklamo engaphezu kwamaphesenti angama-80 esivele iqalile, esungule amathuba emisebenzi ayizinkulungwane ngezinkulungwane. Ngokwakhela kulo mfutho, uhlelo lowezi-2025 kulindeleke ukuthi luqinise ukuzethemba kwabatshalizimali ngesikhathi luqinisekisa ukuthi ama-SMME kanye nosomabhizinisi abasafufusa bathola isabelo esifanele samathuba.