I-Ole Blu isimamisa ukukhula komnotho ngokhula lwasolwandle

I-Ole Blu, inkampani entsha eyasungulwa ngu-Anga Mbeyiya, iguqula ukhula lwasolwandle lube yizixazululo kwezolimo nangaphezu kwalokho.

Le nkampani eseMpumalanga Kapa, ithola ukhula lwasolwandle kumabhizinisi emifelandawonye angaphezu kwama-300 agudle ugu lolwandle lwaseNingizimu Afrika, iluguqule lube umanyolo wemvelo futhi ibheka eminye imikhiqizo efana nokudla kwezinkomo ne-sea moss gel. 

Uhambo lukaMbeyiya lokuba ngusomabhizinisi lusuka ekuphumeleleni kwezemfundo kanye nomuzwa oqinile wokunakekelwa kwemvelo.

Uneziqu zeMaster's ezifundweni zeSustainable Development in Maritime Studies ezivela eNyuvesi yaseGothenburg eSweden, kanye neziqu zeHonours in Development Studies kanye neziqu zeMedia, Communication and Culture ezivela eNyuvesi iNelson Mandela.

Ecabanga ngendlela yakhe, uthe: “Ngemva kokuqeda iziqu zami zezifundo zezindaba, ngangingenaso isiqiniseko sokuthi ngisafuna ukulandela lo mkhakha womsebenzi. Umeluleki wami wayazi ukuthi ngiyikhathalele kangakanani imvelo, wangikhuthaza ukuthi ngiqhubeke nezifundo, angibange ngisabheka emuva.”

Umqondo we-Ole Blu wafika ngesikhathi ephesheya kwezilwandle.

“Ngowezi-2019, nganikezwa ithuba lokufunda eSweden. Ngafunda ngendlela ukhula lwasolwandle lungasiza ekufezeni iZinhloso Zentuthuko Esimeme (ama-SDG). Ngesikhathi ngibuya eNingizimu Afrika, ngaqaphela ukuthi zazingekho izinkampani ezanele ezisebenza ngokukhula lwasolwandle, ngakho ngaqala ukuveza umbono wami ngowezi-2020 ngesikhathi sokuvalwa kwezwe.”

Inkampani yathola uxhaso lwayo lokuqala ngowezi-2023 oluvela e-BFA Global, inkampani yaphesheya esungula izinto ezintsha eseka amabhizinisi abhekana nezinselele. Ukutshala kwayo izimali e-Ole Blu kwayenza ukuthi iqale ukusebenza eKenya, lapho ibhizinisi lase lisebenze khona iminyaka engaphezu kwemithathu ngaphambi kokubuyela eNingizimu Afrika.

“IKenya isinike amathuba okwakunzima ukufinyelela kuwo eNingizimu Afrika. Akuvamile lapha ukuthi inkampani entsha ithole uxhaso olungaba ngiyi-$13,000 (cishe izi-R224,000) ngaphambi kokubona imali engenayo. Ngifisa sengathi uhulumeni angatshala imali eningi mabhizinisini amasha – ekwesekeni abantu,” kusho yena.

Inqubekela-phambili emangalisayo

Naphezu kwalezi zinselele, i-Ole Blu idlondlobale ngokumangalisayo. Le nkampani manje isebenza nabalimi abancane abangaphezu kwama-330 kanye namabhizinisi emifelandawonye ogwini lolwandle, iwanikeza imakethe ethembekile yesivuno sabo sokhula lwasolwandle.

“Umsebenzi wami uyanelisa futhi,” kusho uMbeyiya ngentokozo. “Angisoze ngakhohlwa ngikhalisa owesifazane ngoba sasingabantu bokuqala ukuthenga ebhizinisini lakhe. Kuze kube yileso sikhathi, babengakaze babe nomthengi selokhu babhalisa ibhizinisi labo ngowezi-2017.”

KuMbeyiya, ukuba ngusomabhizinisi kungaphezu nje kwempumelelo yakhe.

“Ngikholelwa ngempela ukuthi indlela engcono kakhulu yokusiza imiphakathi ngukubasiza basungule amabhizinisi — hhayi ngokuthembela kwizibonelelo zikahulumeni,” kuphetha yena.

Ngeminye imininingwane nge-Ole Blu, vakashela ku: www.oleblu.co.za, i-imeyili: connect@oleblu.com, Noma ushayele ku: +27 67 938 3626.