Intshisekelo nenhloso yasungula i-OX-Tailor Designs

Eqhutshwa yintshisekelo nenhloso, u-Evelyn Tebogo Moselakgomo waseMankweng ePolokwane, eLimpopo, ukhombisile ukuthi amaphupho ayafezeka ngempela.  

Waqala i-Ox-Tailor Designs ngowezi-2022, waguqula uthando lwakhe lwemfashini lwaba ibhizinisi elichumayo.

“Ngesikhathi ngithatha isinqumo sokunikeza imfashini ithuba, ngaqala kancane ngomshini omncane wokuthunga futhi ngazifundisa kusukela ekuqaleni. Ngathola ukuthi empeleni ngiyayithanda lento eyenzekayo — kwakukhona okuthile okungigculisayo ngokuthatha umcabango ngiwenze ubonakale ngendwangu nokotini,” kusho yena.

UMoselakgomo uthe ukuhlala egxile entweni ayenzayo kwamsiza ukuthi akhiqize izingubo ezithungwe kahle kakhulu. Ukholelwa ukuthi ukukhiqiza izingubo kuyindlela enamandla yokusungula imisebenzi ngoba kuyimboni edinga abasebenzi abaningi edinga abantu cishe kuzo zonke izigaba — kusukela ekudwebeni nasekuthungeni kuya ekubhekeni ikhwalithi, ekupakisheni, nasekusatshalalisweni.

“Amabhizinisi ahambisana nemfashini abalulekile eNingizimu Afrika ngoba asungula imisebenzi emazingeni amaningi amakhono, acijisa intsha, futhi akhuthaza ikhono lezwe ngesikhathi elondoloza ifa lamasiko. Ngokunciphisa ukuthembela ekuthengeni impahla kwamanye amazwe, aqinisa umnotho, avule iminyango yamathuba okuthumela kwamanye amazwe, futhi agcine imali ijikeleza kuleli lizwe.

“Ubuciko kanye nokuhluka kwamasiko embonini nakho kukhuthaza imikhakha ehlobene efana neyezindwangu, ukuprinta, ukuthwebula izithombe, kanye nokuthengisa — okwenza imfashini ingabi nje isitayela kuphela, kodwa futhi iqhubele phambili ukukhula komnotho kanye nobunikazi besizwe.”

Uyavuma ukuthi ukuqhuba ibhizinisi lokudweba imfashini nokuthungaa izingubo kuza nezinselele, okuhlanganisa ukuncintisana kwabadwebi bemfashini kanye nokungenisa impahla yakwamanye amazwe eshibhile, ukudingwa kwemfashini okuguquguqukayo, kanye nezindleko eziphezulu zezinto zokuthunga ezisezingeni eliphezulu. 

“Kungaba nzima futhi ukuthola abasebenzi abanamakhono nabathembekile ngesikhathi ufuna ukugcina isikhathi esibekiwe kanye nokulindelwe ngamakhasimende ukuze uthole imiphumela esezingeni eliphezulu,” enezela.

Naphezu kwalezi zinselele, uMoselakgomo ujabulea ukunqoba okuningana. “Ezinye zezingxenye ezinhle kakhulu zokuqhuba ibhizinisi lemfashini zifaka phakathi ukuthunga izingubo ezihlukile, ezisezingeni eliphezulu eziletha ukwaneliseka kwamakhasimende kanye nebhizinisi eliphindaphindayo, ukuzakhela igama elibonisa ubuhlakani bakho kanye nombono wakho, kanye nokuguqula ikhono lomuntu libe umthombo osimeme wemali engenayo.”

I-Ox-Tailor Designs iphinde ifake isandla ekusungulweni kwemisebenzi nasekuxhaseni ngokuthuthukiswa kwamakhono. Ibhizinisi lifaka izitayela zomdabu emfashinini yesimanje, ligcina amagugu namasiko ngesikhathi likhuthaza ukusungula izinto ezintsha.

Ngokusho kukaMoselakgomo, i-Ox-Tailor Designs isungule ngqo imisebenzi emine — yaqasha oklinayo, umsizi womthungi, umdwebi wezithombe, kanye nomsizi obheka amabhuku. “Umsebenzi ngamunye udlala indima ebalulekile ekugcineni ibhizinisi lihamba kahle ngesikhathi inikela emisebenzini yendawo kanye nokuthuthukiswa kwamakhono,” kusho yena. 

Nakuba engakaze athole uxhasomali lwangaphandle, uMoselakgomo usenqubweni yokufaka isicelo sokuxhaswa ngezimali ukusiza ibhizinisi likhule.

“I-Ox-Tailor Designs ayizona nje izingubo zokugqoka kuphela — imayelana nentshisekelo, ukunaka imininingo, nokwenza abantu bazizwe bezethemba. Okwaqala njengendlela yokulandela umoya wami wokuba nebhizinisi sekukhule kwaba yibhizinisi elisungula imisebenzi futhi lisize umphakathi. Ngihlela futhi ukubuyisela emphakathini ngokuthunga umfaniswano wesikole wezingane eziswele. Lolu hambo lubonisa ukuthi ngokusebenza kanzima nokugxila kulokho engikwenzayo, iphupho lingaba ibhizinisi elinenjongo elishintsha izimpilo,” kusho yena.

Ngeminye imininingwane nge Ox-Tailor Designs vakashela ku: www.oxtailordesigns.co.za