Ungawavikela kanjani amabele akho

UMfumfu yinyanga eyaziwa njengeNyanga Yokuqwashisa Ngomdlavuza Webele, okuyisikhathi esibekelwe ukufundisa nokucijisa abesifazane ukuthi banake impilo yamabele ngokuthi bahlole baphinde baxilonge kusenesikhathi futhi zikhathi zonke. 

Cishe isigidi esiyi-19.4 sabesifazane eNingizimu Afrika abeneminyaka eyi-15 naphezulu baphila ngaphansi kwengcuphe yokutholwa nomdlavuza webele, okungumdlavuza ovamile ukuhlasela abesifazane kuleli lizwe.  

Ngowezi-2013, izibalo zabashone ngomdlavuza webele kanye nemidlavuza yezitho zabesifazane cishe zibe amaphesenti amabili ezibalweni sezizonke zokufa phakathi kwabesifazane eNingizimu Afrika. 

Nakuba ubungozi bokuba nomdlavuza webele kuya kukhula ngokukhula kweminyaka, abesifazane abasebasha nabesilisa nabo basengaba nayo. Izindlela zokuphila ezifana nokukhuluphala ngokweqile, ukungavocavoci umzimba, ukuphuza utshwala, ukubhema, nokudla ukudla okungenampilo kungandisa ubungozi.  Abesifazane abanomlando womndeni womdlavuza webele kufanele nabo baqaphele kakhulu.

Enye yezindlela ezilula nezisebenza kahle kakhulu zokuthola uma kukhona uguquko olungavamile kusenesikhathi ukuzihlola wena amabele njalo ngenyanga. Kulula, kuyashesha, futhi kungenza umehluko omkhulu.

Indlela Yokuzihlola Amabele

1.  Esibukweni

• Yima phambi kwesibuko bese uhlola amabele akho ukuthi awanalo yini ushintsho olubonakalayo njengokuba nezifaca, ukushwabana, ushintsho kubukhulu bebele, ukuma, noma umbala, noma ukuphuma koketshezi engonweni.
• Hlola ngezindlela ezahlukene: izingalo ezinhlangothini zakho, izingalo phezu kwekhanda, kanye nezandla ezicindezelwe ezinqulwini ngesikhathi ugobela ngaphambili.

2.  Ulele phansi

• Lala ngomhlane wakho nomcamelo ngaphansi kwehlombe lakho kwesokudla kanye nesandla sakho sokudla ngemuva kwekhanda lakho.
• Usebenzisa iminwe yakho yesokunxele, thinta uzungezise iminwe ebeleni lesokudla, uhambise iminwe ebeleni lonke nasekhwapheni ukuya ngasentanyeni.
• Phinda ohlangothini lwesobunxele.

3.  Uma ugeza

• Uma isikhumba sakho sishelela uma sinensipho, phakamisa ingalo eyodwa bese uhlola ibele ngalinye ngokuhambisa iminwe uyizungezise ndendlela efanayo.
• Uma ubona izigaxa ezingaywayelekile, uketshezi oluphumayo, ukuvuvukala, noma libukeka noma kukhona okuhlukile okuzwayo emabeleni akho, bonana nomhlinzeni wezempilo ngokushesha.

Lolu lwazi luthunyelwe yi-CANSA.

Ngeminye imininingwane noma ukuthola usizo, thinta iNhlangano Yomdlavuza eNingizimu Afrika (i-CANSA):

• Ucingo lwamahhala: 0800 22 6622
• WhatsApp (umyalezo obhaliwe kuphela): 072 197 9305 (iSingisi neSibhunu)
• WhatsApp (umyalezo obhaliwe kuphela): 071 867 3530 (isiXhosa, isiZulu, Sesotho, Setswana neSepedi)
• I-imeyili: info@cansa.org.za