Utshalomali lwase-EU lweseka ukukhula komnotho okubandakanya wonke umuntu nosimeme eNingizimu Afrika

Ngesonto eledlule, sibe nethuba lokuya kwi-Global Gateway Forum eBrussels ngesimemo sikaMongameli weKhomishini ye-European Union (i-EU) u-Ursula von der Leyen. 

Le foramu ikhombisa izinhlelo zotshalomali ze-EU kwezinye izifunda zomhlaba futhi kuhloswe ngayo ukuthuthukisa ubudlelwano bayo nomhlaba wonke.

Ukuba khona kweNingizimu Afrika kule foramu kulandela iNgqungquthela yeNingizimu Afrika ne-European Union eyayibanjelwe eKapa ngoNdasa ukuze kuthuthukiswe ubudlelwano bezepolitiki nomnotho phakathi kwezwe lethu namazwe angamalungu e-EU.

Engqungqutheleni eKapa, ​​i-EU yamemezela iphakheji yotshalomali olungama-euro ayizigidigidi eziyi-4.7 ukweseka imiklamo yamasu aseNingizimu Afrika.

Ngesonto eledlule, i-EU yamemezela iphakheji yotshalomali olwengeziwe oluzoletha utshalomali lwenani eliphelele lwezigidigidi eziyi-11.5 zama-Euro, okuyinani elingaphezu kwezigidigidi ezingama-R230.

Lobu budlelwano obusha bugxile ezintweni eziseqhulwini iNingizimu Afrika ezibekele zona njengoba izama ukuthuthukisa izimpilo zabantu bayo. Lezi zinto eziseqhulwini zifaka phakathi utshalomali, ukuguqukela kwezamandla acocekile, amakhono nobuchwepheshe, ukuxhumana kanye nokuthuthukisa izimboni eziza ezibalulekile. Okubalulekile, lokhu kubambisana kuzofaka igalelo emsebenzini owenziwayo ukudala amathuba emisebenzi. 

Iphakheji yotshalomali ihlanganisa imikhakha efana nezimbiwa ezibalulekile, ukwenziwa kwe-e-battery, ihayidrojini ecocekile, amandla avuselelekayo kanye nemithi yokugoma. Lokhu kuzoholela ekusungulweni kwamathuba emisebenzi amaningi, ukuthuthukiswa kwamakhono kanye nokudluliselwa kobuchwepheshe.

Njengoba sishilo eBrussels, lolu tshalomali luzosekweseka umzamo wethu wokwakha umnotho wesikhathi esizayo eNingizimu Afrika yamanje. Luzosiza ukusheshisa isifiso seNingizimu Afrika sokuguqukela emnothweni wekhabhoni ephansi olungele futhi obandakanya bonke abantu.

Iphakheji ihlose ukunxenxa ukutshalwa kwezimali ekukhiqizweni nakucoceni izimbiwa kuleli lizwe ezibalulekile ekuguquleni ezamandla. Ihlanganisa utshalomali kwimiklamo yokukhiqiza ihayidrojini ecocekile kanye nezinto ezizobeka iNingizimu Afrika njengomkhiqizi ohamba phambili emhlabeni wonke emnothweni wezwe kanye nokuthekeliswa kwempahla.

Kulindeleke ukuthi utshalomali lusheshise imiklamo emikhulu yamandla adonswa ngelanga nangomoya, ngesikhathi kukhulisa ukusebenza kahle kwezamandla embonini, emakhaya kanye nasezinsizakalweni zomphakathi. Lezi zinyathelo zizonciphisa ukuthembela emalahleni, zinciphise izindleko futhi zithuthukise ukuphepha kwezamandla emakhayai kanye namabhizinisi. 

Njengezwe, besilokhu sigcizelela ukuthi ukuguqukela kwethu kwezamandla acocekile kumele kube nobulungiswa futhi kubandakanye wonke umuntu, nokuthi kumele sithathe izinyathelo eziqondile zokuvikela abasebenzi, imiphakathi kanye namabhizinisi azothinteka. Yingakho ingxenye yephakheji yotshalomali inikezelwe ekuvuseleleni amakhono, ukuqeqesha kanye nokuhlinzeka ngamathuba osomabhizinisi. Izophinde isetshenziselwe ukwandisa ukufinyelela emanzini ahlanzekile, ukulawulwa kwemfucuza kanye nezinsizakalo zomphakathi ezisebenzisa amandla ngendlela ephumelelayo. 

Iphakheji yotshalomali izophinde yeseke umsebenzi iNingizimu Afrika ewenzayo wokuthuthukisa ingqalasizinda yethu yesitimela, imigwaqo kanye namachweba, ezokuthutha impahla kanye nokuxhumana kwedijithali.

Lolu tshalomali luzophinde lweseke ukukhiqizwa kwemithi kuleli lizwe ngokubambisana neziphathimandla ezilawulayo, kanye nemiklamo yocwaningo lwezinto ezintsha, ukuqeqeshwa kanye nokwakhiwa kwamakhono kwibiotechnology kanye nengqalasizinda yemithi.

Le phakheji yotshalomali imenyezelwa ukuze imelane nesimo senqubekela-phambili esiyenzayo ekubhekaneni nezinye zezithiyo ezibalulekile ekukhuleni komnotho okubandakanya wonke umuntu.

Njengezwe, senze inqubekela-phambili enkulu ekunqobeni izithiyo zethu zokuhlinzekwa kwamandla ngokulandela ukusebenza okuthuthukisiwe kwe-Eskoma kanye nokutshalwa kwezimali okukhulu ekukhiqizweni kwamandla avuselelekayo. Sithuthukisa ukusebenza kahle emachwebeni ethu futhi sivula imizila yethu yezitimela zempahla kubasebenzi abazimele. Sitshala imali enkulu kwingqalasizinda futhi senza lula imithethonqubo yokuthuthukisa indawo yabatshalizimali. Inqubekela-phambili esiyenzayo ngezinguquko zethu iyaqashelwa futhi yenza izwe lethu libe yindawo yokutshalwa kwezimali. Sithathwa njengentuba yokungena ezwenikazini lase-Afrika. 

Utshalomali lwe-EU lufike ngesikhathi sesimo somhlaba oguqugoqukayo. Kukhona izinguquko ezinkulu kwezokuhweba nokutshalwa kwezimali phakathi kwamazwe. Ngaphezu kwalokho, intuthuko esheshayo kwezobuchwepheshe kanye nenkinga yesimo sezulu ekhulayo inegalelo ekuletheni ungabazane.

Yingakho iNingizimu Afrika iqhubeka nomsebenzi wokwakha umnotho oqinile nosimeme obhekana nezidingo zamanje ngesikhathi izibeka esimweni sokubhekana nezidingo nezinselele zesikhathi esizayo.

Lo myalezo kaMongameli washicilelwa okokuqala mhla ziyi-13 kuMandulo wezi-2025.