Umbono waphenduka waba ibhizinisi i-Immaculate Cleaning

Ngesikhathi usomabhizinisi waseGoli uZanele Stole ebhalisa i-Immaculate Cleaning ngowezi-2015, wayazi ukuthi kuzothatha okungaphezu kwamaphepha ukwakha ibhizinisi lamaphupho akhe. Le nkampani yaqala ukusebenza ngowezi-2017 futhi kusukela lapho isikhule yaqasha abantu abangama-27, inegatsha eGoli kanye namahhovisi amabili angaphansi kwayo eThekwini.

I-Immaculate Cleaning izitholele indawo emkhakheni oncintisayo wezinsizakalo zezikhungo, inikeza izixazululo zokuklina, ukuhlanzeka, kanye nokuqeda izilokazane. Amakhasimende ayo afaka phakathi amahhovisi, izindawo zokupaka, izikhungo zezitolo, abathengisi bezimoto, kanye nezakhiwo zikahulumeni. Izinsizakalo zenkampani zisukela ekuklinisiseni kanye nokuklina ngemva kokwakhiwa kuya kokhaphethi, amafasitela, kanye nosofa.

“Uhambo lwami lwebhizinisi lwaqala ngesifiso sami sokuzimela. Ngangifuna ukusungula into eyayizoshintsha impilo yami ngesikhathi ngisasebenza enkampanini,” echaza.

Uthando lwakhe lomkhakha wokuklina lwavuselelwa yizinto ayezibona nsuku zonke. “Ngakhangwa kakhulu yimboni yokuklina ngoba ngaphawula ukuthi izinkampani ezinkulu zazinakekela kanjani izakhiwo esasisebenza kuzo. Naphezu kwezinsizakusebenza zabo, angizange nganeliseke ngendlela ezazenza ngayo izinto,” kusho yena.

Ngaleso sikhathi, uStole wayesebenza ekuthuthukisweni kwebhizinisi, exhumana njalo nosomabhizinisi. Ithuba lakhe lokuqala lavela ngekhasimende lokwakha. “Ikhasimende lami kwezokwakha laba yikhasimende lami lokuqala lokuklina kanye nereferensi. Ngaleso sikhathi, ngangibanikeza izinto zokuklina kuphela, hhayi izinsizakalo zokuklina.”

Impumelelo yangempela yeza ngemuva kokuba eqale ukuya emihlanganweni echaza ngamathenda. I-Immaculate Cleaning yathola inkontileka yayo yokuqala yonyaka owodwa ne-ejensi kahulumeni. “Asizange senze nzuzo ngalowo nyaka ngoba ngangifuna ulwazi kanye nencwadi yereferensi. Kule mihlangano, ngafunda ukuthi ngaphandle kwereferensi, awutholi amathuba.”

Leyo nkontileka yokuqala, eyaqala ngomuntu oyedwa owayeklina endaweni, yavula umnyango wamaphrojekthi amakhulu. Ushintsho olukhulu lwenzeka ngowezi-2019 lapho ethola inkontileka yokuhlinzeka ngamathishu asendlini encane. “Ngesikhathi ngigcwalisa leyo nkontileka, ngabuza ukuthi bangasebenzisa yini nezinsizakalo zethu zokuklina. Bacela ubufakazi bokuthi ngike ngakwenza ngaphambilini, ngabanika incwadi yereferensi engangiyithole enkontilekeni yethu yangaphambilini. Banginika inkontileka yezinyanga ezintathu — futhi leyo ndawo yayinabantu abane abaklinayo, okokuqala ngqa ngiphethe abantu.”

Kwabe sulandela ukwaziwa ngokushesha. I-Immaculate Cleaning and Hygiene Services yawina uMncintiswano wakwa-Eskom Wotshalomali Lwamabhizinisi (iBIC) ngowezi-2020 emkhakheni Wezohwebo Nezinsizakalo. UStole uphinde waba yingxenye yowamanqamu kumaStandard Bank Top Women Awards ngowezi-2020 kanye nakumaYoung Achiever Finalist kumaTop Empowerment Virtual Summit and Awards ngowezi-2021.

Indaba yakhe iyisibonelo esihle esibonisa ukubekezela, ukufunda, kanye nokuzethemba okungaguqula ngayo ithuba elilodwa libe yibhizinisi elichumayo elisungula amathuba emisebenzi futhi likhuthaze abanye.

Ngeminye imininingwane nge-Immaculate Cleaning and Hygiene Services, vakashela ku: www.immaculateservices.co.za. 

BIC: https://www.eskom.co.za/about-eskom/corporate-social-investment/business-investment-competition/