Kusuka ebunzimeni kuya empumelelweni

Enkabeni yeSifunda sase-Overberg, eBredasdorp eNtshonalanga Kapa, ​​iPieters Flowers & Events ikhule kusukela izabalaza yaze yaba ibhizinisi elichumayo elikhiqiza amaprotea namafynbos aseNingizimu Afrika ezimakethe zakuleli lizwe naphesheya kwezilwandle.

Yasungulwa eminyakeni eyisikhombisa edlule nguLesley-Ann Pieters nomyeni wakhe, uSarel, leli bhizinisi liwubufakazi bokuqina, ukusebenza kanzima nokuzimisela. 

“Sisebhizinisini lezimbali. Sihlinzeka ngamaprotea namafynbos ezimakethe zakuleli lizwe kanye nakwamanye amazwe,” kusho uLesley-Ann, umnikazi kanye nomqondisi wenkampani. 

“Leli bhizinisi laqala eminyakeni eyisikhombisa edlule ngemuva kokuba mina nomyeni wami silahlekelwe yimisebenzi yethu lapho inkampani ethekelisa izimbali esasiyisebenzela ithengiselwa abanikazi abasha.”

Kunokuba bavumele ishwa lithunaze ikusasa labo, laba bashadikazi baguqula lobu bunzima kwaba yithuba.

“Saqala leli bhizinisi ngaphandle kwesenti. Sasingenayo imali. Ngesikhathi silahlekelwa yimisebenzi, umyeni wami waya kosebenzela enye inkampani, kanti umnikazi wayenendawo eyayitshala ifynbos namaproteas kodwa wayengazi ukuthi enzeni ngayo. Ngamcela ukuba angithengisele izimbali ukuze ngizame ukuziphilisa. Futhi yileyo ndlela esaqala ngayo,” kukhumbula yena. 

Kusukela kulezo zixha zezimbali zokuqala uLesley-Ann azihlela wazithengisa, iPieters Flowers yakhula kancane kancane.

“Ngemva konyaka, umyeni wami washiya umsebenzi wakhe wazongisiza ukukhulisa ibhizinisi…”

Enye yezinselele ezinkulu zenkampani kube ukuthola umhlaba. “Ngokunqundwa yizinsizakusebenza ezifana nomhlaba, saxhumana nabalimi abancane bendawo sasayina izivumelwano zokuqasha. Yiyona ndlela esikwazi ukuqhubeka nokuqhuba ibhizinisi kuze kube namuhla. Kodwa izivumelwano zokuqasha ezesikhathi esifushane kuphela. Kungasisiza kakhulu ukuthola umhlaba wethu - okungenani amahektha angama-25 - bese sitshala imikhiqizo yethu,” kuchaza yena.

Naphezu kwezingqinamba, iPieters Flowers isikhule yaba umqashi obalulekile esifundeni.

“Le nkampani namuhla inabasebenzi abayi-15 abaqashwe ngokugcwele, futhi phakathi kukaMfumfu noNhlolanja sithatha abanye abasebenzi abayi-12 abaqashwe okwesikhashana ukuze sihlangabezane nesidingo sesikhathi sonyaka,” kusho uLesley-Ann. 

Usizo oluvela eMnyangweni Wezolimo waseNtshonalanga Kapa nalo lusisizile sakhula. “Eminyakeni emibili edlule, sathola usizo ngesiqandisi kanye nesibonelelo sezi-R300 000 sokuthenga iveni (imoto yokuthutha impahla). Lokho kwasisiza kakhulu.”

Leli bhizinisi, elithekelisa amaprotea namafynbos emazweni akude njengaseShayina naseYurophu, liphinde lithengisele abathengisi bezimbali abazimele kanye nezimakethe zakulo lonke elaseNingizimu Afrika.

Ukuya phambili, uLesley-Ann unethemba lokuthi uhambo lwakhe luzokhuthaza abanye ukuthi bathathe ithuba uma balandele izifiso zabo. "Ngithemba ukuthi indaba yethu ingaletha ugqozi kothile. Ungahlali nje nephupho lakho ungenzi lutho ngalo. Kufanele uqale ndawana thize," ephetha. 

Ngabe bewazi?

IShayina iyilunga leQembu lamazwe angamashumi amabili (i-G20). I-G20 ihlanganisa amazwe asebenza ukuqinisa ukukhula komnotho emhlabeni, agqugquzela ukuhweba, futhi akhuthaze intuthuko esimeme. INingizimu Afrika izosingatha iNgqungquthela ye-G20 elandelayo ngoLwezi.

Ngeminye imininingwane, thumelela uLesley-Ann i-imeyili ku: pieterslesleyann4@gmail.com  
Thola uMnyango Wezolimo eNtshonalanga Kapa ku: www.westerncape.gov.za/agriculture