UHlelo lweSkyBound lusiza amantombazane ukuthi andize

KuTshiamo Chauke oneminyaka eyi-16 ubudala, ukubukela amabhanoyi endiza phezu kwekhaya lakhe kwakuyinto nje azichithela ngayo isikhathi. Wayengakaze acabange ukuthi suku lumbe angazithole ethatha amagxathu okuqala emhlabeni wezindiza. 

Ngokusizwa i-Air Traffic and Navigation Services (i-ATNS), angasondela kakhulu ekubeni ngumlawuli wezindiza.

I-ATNS yi-ejensi yoMnyango Wezokuthutha.

“Ngikhumbula ngisakhula, ngangivame ukubheka phezulu esibhakabhakeni uma izindiza zidlula ukuze ngizibuke. Angikaze ngicabange ukuthi ngingandiza noma ngizilawule ngokwami”, kusho uChauke.

I-ATNS iphatha ukuhamba kwezindiza, umzila wezindiza, ukuqeqeshwa kanye nezinsizakalo ezihlobene nalokhu eNingizimu Afrika futhi ilawula izindiza kuso sonke isifunda se-Africa-Indian Ocean (i-AFI), esihlanganisa cishe amaphesenti ayisithupha esikhala sezindiza emhlabeni.

UChauke uyingxenye yeqembu labesifazane abayisishiyagalombili abathanda izindiza abavela kulo lonke elaseNingizimu Afrika abaye bathola ukubona nje kancane ukuthi imisebenzi yabo esikhathini esizayo ingaba njani ngemuva kokukhethwa ukujoyina uHlelo Lokuthuthukiswa Komsebenzi Wezindiza i-SkyBound olusanda kwethulwa.

Lolu hlelo luyingxenye yesu le-ATNS lesikhathi eside le-Cradle to Career, eliseka abafundi kusukela ebangeni le-10 kuze kube yilapho beqashwa. Luhlose ukubhekana nokuntuleka kwamakhono kwezezindiza kanye nemikhakha ehambisana nayo, ngesikhathi lucijisa abesifazane abasebasha kulo mkhakha.

UChauke ojabule kakhulu, wase-A.D.L. Rampola School eLimpopo, uthe usemagange ukungena embonini yezindiza.

“Iningi lamantombazane ezweni lethu alinantshisekelo kwezezindiza… Kubalulekile ukukhetha umsebenzi ohlobene nobuchwepheshe ngoba ubuchwepheshe buzothatha indawo,” kusho yena. 

Phakathi kwezinto eziningi zokuqala uChauke nontanga yakhe ababhekana nazo kwakuwukundiza ngendiza okokuqala ngqa.

“Ukuba sendizeni kakhulu, kodwa nganginovalo… Lolu hambo lunginike ithuba lokundiza futhi luyinto engangingakaze ngicabange ukuthi ngiyoke ngiyenze,” kusho uChauke ejabule.

Omunye umfundi, u-Ontlametse Mokgadi (16), wase-K.S. Shuping High School eNyakatho Kapa, ​​uthe, “Ekuqaleni, ngangingenatshisekelo ezindizeni, kodwa ngenze ucwaningo lwami futhi ngaqonda ngemboni manje senginentshisekelo.”

Wacabanga ngokundiza kwakhe kokuqala indlela okukhumbuleka ngayo, ekuchaza jengokwakunomuzwa ojabulisayo owajulisa uthando lwakhe lwezindiza. 

Ukwazi ngemisebenzi yezindiza

UMphathi Wezokumaketha we-ATNS uTebogo Ntshudisang, uthe lolu hlelo luhlose ukubonisa abafundi abasebasha abavela emakhaya ahlwempu imisebenzi eyahlukene yezindiza, kusukela ekushayeleni amadrone kuya ekulawuleni ukuhamba kwezindiza nokubafundisa ngamathuba ahlukahlukene atholakalayo emkhakheni wezokuthutha ikakhulukazi njengoba uMfumfu kuyinyanga Yezokuthutha.

“Lolu hlelo luhambisana nomgomo wenyanga yezokuthutha, lapho siqwashisa ngokubaluleka komkhakha wezokuthutha ekukhuleni komnotho kanye nokuguqulwa kwawo.”

Inyanga Yezokuthutha kuhloswe ngayo ukukhulisa ukuqwashisa ngendima ebalulekile edlalwa ezokuthutha emnothweni wezwe.

“Thina kwa-ATNS sijabule kakhulu ngalolu hlelo. Lesi yisikhathi sokuqala ukuthi sibe nabafundi bethu be-SkyBound, futhi sibheke phambili ekubaqeqesheni. Sithatha abafundi kusukela kuBanga le-10 kuya kwele-11 ngokuthi bangenele umncintiswano wethu, esiwuqhuba ezikoleni zethu esakhetha ukusa utshalomali lwemisebenzi yomphakathi. Sikhethe abafundi ababili abavela KwaZulu-Natali, eLimpopo, eMpumalanga naseNyakatho Kapa,” kusho uNtshudisang.

Abafundi baphinde bathola nethuba lokukhulumisana nomshayeli wedrone waseNtsu Aviation, owabatshela ngamathuba atholakalayo ekushayeleni idrone kanye nezinto ezidingekayo ukuze bangene kulo mkhakha. 

UChauke, owake wabuka isibhakabhaka ebuka izindiza, manje uqinisekile ukuthi eminyakeni eyishumi ezayo, uzoba esikhundleni esiphezulu njengomlawuli wezindiza wesifazane.

“Akuvamile ukuthola intombazane kulowo mnyango, futhi kuzongenza ngihluke kwabanye,” kuphetha uChauke.

Ngeminye imininingwane, xhumana ne-ATNS ku: www.atns.co.za. 

Ngabe bewazi?

UMfumfu yiNyanga Yezokuthutha, isikhathi lapho iNingizimu Afrika igubha khona inqubekelaphambili emikhakheni yemigwaqo, yezitimela, yezasolwandle kanye neyezindiza. Ngezinhlelo ezifana neSkyBound Aviation Career Development Programme, i-ATNS itshala imali esizukulwaneni esilandelayo sochwepheshe bezindiza futhi iqinisekisa ukuthi intsha, ikakhulukazi amantombazane, inethuba lokudlondlobala kulo mkhakha.