Ho etsa kopo ya tjhelete ya Lebenkele la Spaza: Tataiso ya mohato ka mong Tataiso ya mohato ka mong

Beng ba mabenkele a spaza ba batlang ho hodisa dikgwebo tsa bona ba ka etsa kopo ya tshehetso ho tswa ho Letlole la Tshehetso la Mabenkele a Di-spaza.

Letlole le thakgotswe ka 2025 ke Lefapha la Ntshetsopele ya Dikgwebo tse Nyane (DSBD), mme le reretswe ho tshehetsa mabenkele a di-spaza le a mang a dijo a tshwanelehang ho phatlalla le Afrika Borwa. Lenaneo lena le reretswe ho thusa dikgwebo tsa makeisheneng le mahaeng ho ntlafatsa tlhodisano ya tsona, ho theha mesebetsi esitana le ho kenya letsoho ntshetsopeleng ya moruo wa lehae.

Letlole le tshehetsa dikgwebo tse tshwanelehang ka tjhelete e fihlang ho R100 000. Tshehetso e ka hodimo ho R50 000 e ba tshehetso e arohaneng habedi, 50% ya yona e ba tshehetso mme 50% e nngwe yona e ba sekoloto. Tshehetso ena ya tjhelete e ka sebediswa bakeng sa dintlafatso tsa lebenkele, thupello ya kgwebo ha mmoho le theko ya thepa ya lebenkele. 

Beng ba dikgwebo ba lakatsang ho fihlella tjhelete ena ba kgothaletswa ho latela mehato e latelang:

Mohato wa 1: Lekola hore na kgwebo ya hao e a tshwaneleha 

Pele o etsa kopo, etela websaete ya letlole mme o lekole ditlhoko tsa tshwaneleho ho netefatsa hore kgwebo ya hao e a tshwaneleha bakeng sa tshehetso.

Ho ka tshwaneleha, monga spaza e tlameha ho ba moahi wa Afrika Borwa kapa a be a fumane boahi ba Afrika Borwa pele ho 1994. Kgwebo e tlameha e be e sebetsa lekeisheneng kapa mahaeng mme e sebeletse setjhaba sa lehae. 

Kgwebo e tlameha e be e ngodisitswe le mmasepala wa lehae ho latela melawana e amehang le ditlhoko tsa dilaesense. Ho feta moo, bakopi ba tlameha ho ingodisa le Setheo sa Afrika Borwa sa Pokeletso ya Lekgetho (SARS) kapa ba be ba ingodisitse nakong ya dikgwedi tse tsheletseng.

Mabenkele a di-spaza a tlameha ho ikamahanya le melao yohle e amehang, ho kenyeletswa le e amanang le tokiso ya dijo le tsa bophelo bo botle le polokeho. Monga lebenkele o tlameha hore a be a le tsamaisa ka boyena.

Mohato wa 2: Bokella ditokomane tse hlokehang 

Bakopi ba lokela ho hlophisa ditokomane tsohle tsa tshehetso pele ba qala kopo ka inthanethe. Tsona di kenyeletsa:

• Khophi e netefaditsweng ya boitsebiso ya Afrika Borwa.
• Ditokomane tsa ngodiso ya kgwebo.
• Bopaki ba aterese ya kgwebo.
• Bopaki ba hore lebenkele la spaza kapa la dijo le a sebetsa.
• Ditokomane tsa netefatso ya akhaonte ya banka.
• Lengolo la tumello ya kgwebo le fanweng ke mmasepala.

Bakopi ba batlang tjhelete e fetang R80 000, ba tla boela ba tlameha hore ba ngodise dikgwebo tsa bona le Khomishene ya Dikhamphane le Thepa ya Mahlale (CIPC) nakong ya dikgwedi tse tsheletseng ka mora ho fumana tjhelete.

Mohato wa 3: Kenya kopo ka inthanethe

Hang ha tlhahisoleseding yohle le ditokomane di bokelletswe, bakopi ba ka nehelana ka kenya dikopo tsa bona ka inthanethe ho https://systemsnew.sefa.org.za/SMMEPortal/

Bakopi ba lokela ho netefatsa hore dintlha tsohle tse fanweng di nepahetse le hore ditokomane tsa tshehetso di rometswe ka nepo ho inthanethe.

Mohato wa 4: Emela tekolo 

Dikopo di tla lekolwa ho latela ditlhoko tsa lenaneo. Ho tla iteangwa le bakopi haeba ho hlokeha dintlha tse eketsehileng nakong ya tshebetso ya tekolo.

Dihlopha tsa bohlokwa 

Letlole le beha ka sehlohlolong baitshebetsi ba batjha ba dilemong tse pakeng tsa 18 le 35, dikgwebo tsa basadi le tsa ba sa itekanelanang.  

Tlhahisoleseding ena e fanwe ke Letlole la Tshehetso ya Mabenkele a Di-spaza: www.spazashopfund.co.za