Leano le le Tshwaraganetsweng la go Thibela Botlhokotsebe le Ditiragalo tsa go Melelana Meno (ICVPS)

1. ICVPS ke eng?

Leano le le Tshwaraganetsweng la go Thibela Botlhokotsebe le Ditiragalo tsa go Melelana Meno (ICVPS) ke leano la puso le maitlhomo a lona e leng go dira gore setšhaba se tshwaragane mo go lwantshaneng le modi wa botlhokotsebe. Leano leno le dumela gore pabalesego ga se maikarabelo a SAPS kanosi mme ke maikarabelo a “puso yotlhe” le “setšhaba sotlhe”.

ICVPS e ikaegile ka dipinagare di le thataro, e leng:

Pinagare ya ntlha: Go nna le ditheo tsa twantsho ya botlhokotsebe tse di dirang tiro e e tswileng diatla: Eno e bua ka lekala la twantsho ya botlhokotsebe le le dirang tiro e e manontlhotlho, le le tsibogelang setšhaba ebile le dira ka botswapelo fa go tla mo go samaganeng le ditlhokwa le go rarabolola mathata a pabalesego le botlhokotsebe a a aparetseng setšhaba.

Pinagare ya bobedi: Go tsaya dikgato nako e santse e le teng go thibela botlhokotsebe le ditiragalo tsa go melelana meno fa ka mo le lengwe seno se dira gore go rene pabalesego: Eno e samagana le dintlha tsa pabalesego le tsa go thibela botlhokotsebe le ditiragalo tsa go melelana meno mo baneng ba santse ba le bannye, mmogo le go dira gore matsatsi a ntlha a le sekete mo botshelong jwa bona e nne a a siameng. Le mo dikolong tsa bomapimpana, bana ba tshwanetswe go thokomelwa le go rutwa sentle, mmogo le ba ba tsenang sekolo, mo motseng, kwa mabaleng a metshameko,le gongwe le gongwe kwa ba yang teng ba tshwanetse go ikutlwa ba babalesegile. 

Pinagare ya boraro: Go thusa batswasetlhabelo: Eno e bua ka seabe se mongwe le mongwe yo a nang le seabe mo go tsweng batswasetlhabelo thuso a tshwanetseng go se emela, ka go ba naya tshegetso le tlhokomelo e e ba tshwanetseng, le go samagana le dikgoreletsi dingwe le dingwe tse ba ka tswang ba lebane le tsona. Go tsenya tirisong lekwalo la ditshwanelo tsa batswasetlhabelo go botlhokwa thata.

Pinagare ya bone: Kabo ya ditirelo e e tshwaraganetsweng e e tswileng diatla fa go tla mo pabalesegong, tshireletsegong mmogo le mo go thibeleng ditiragalo tsa go melela batho ba bangwe meno: Re tshwanetse go golaganya batho botlhe le ditirelo tse di maleba mmogo le didirisiwa tse di maleba gore baagi ba amogele thuso e ba e tlhokang gore ba babalesege. Seno se bua gape le ka thebolo ya ditirelo tse di botlhokwa, go tlisetsa baagi matsholo le ditirelo tse di samaganang le mathata a lehuma, a botlhokatiro, a go se lekalekane mmog le go tlhotlhetsa kgolo mo go itireleng letseno ga baagi. Go tshwanetse go nne le thulaganyo e e tsamaisiwang ka tolamo e e dirisiwang go golaganya tirisanommogo magareng ga bannaleseabe botlhe.

Pinagare ya botlhano: Go rulaganya mafelo a bodulo ka mokgwa o o tla tlisang pabalesego: Go rulaganya mafelo a re dulang mo go ona ka tshwanelo go mosola mo go tliseng pabalesego le mo go thibeleng botlhokotsebe le ditiragalo tsa go melelana meno mo setšhabeng sa rona. Fa go logwa maano a go rulaganya mafelo a kwa metseseteropong le metseselegaeng go tshwanetse go tsewe tsia pabalesego ya batho, go naya motlhala, go tshwanetswe go netefatswe gore dipone tsa mo mebileng di dira sentle go bonesa mafelo gore batho ba ikutlwe ba babalesegile, go tshwanetswe gore ditlhatshana le bojang jo boleele di remiwe mo mafelong ao go fetsa maatla badiri ba ditiragalo tsa botlhokotsebe, mmogo le go aga mafelo a metshameko le a boitapoloso mmogo le a go tshwarela dikopano tsa baagi. Seno se tla tokafatsa maikutlo a pabalesego mo baaging le go dira gore go nne le tikologo e e babalesegileng le e batho ba itumelelang yone. 

Pinagare ya borataro: Go dira gore setšhaba mmogo le baagi mo metseng ba nne le seabe: Fa re dira gore setšhaba se nne le seabe se se botlhokwa mo go logeng maano a go thibela botlhokotsebe le ditiragalo tsa go melelana meno, re matlafatsa baagi ba naga ya rona le batho ba naga ya rona go tsaya tsia pabalesego ya bona. Seno se raya gape le gore ba tshwanetse go nna le seabe mo ditiragalong tsa go rulaganya pabalesego mo mafelong a ba nnang mo go one, kwa mafelong a ba dirang kwa go ona, kwa dikolong, kwa mabenkeleng a magolo, le kwa mafelong a mangwe le a mangwe a ba phelang mo go ona. Go tlhongwa ga baemedi ba baagi go naya baemedi ba baagi tšhono ya go emela baagi mo dithulaganyong tsotlhe tse di amanang le go logiwa ga maano a pabalesego ya baagi mmogo le go nna le seabe mo dikgatong tsa thibelo ya botlhokotsebe mo mo metseng e ba nnang mo go yona.

2. Seabe sa me mo leanong la ICVPS ke eng jaaka moagi?

Jaaka moagi, go mo diatleng tsa gago gore o itirele tikologo e e babalesegileng mo teng ga lefelo le o nnang mo go lona, ka gale o tshwanetse o nne o ntshitse matlho dinameng, o tshwanetse go bega ditiro dingwe le dingwe tse di belaetsang tse o bonang di diriwa ke baagisani ba gago, itse baagisani ba gago gore ke batho ba mofuta mang mmogo le batho ba ba nnang mo lefelong le o nnang mo go lona, itse gore ke eng se puso e ka go direlang sone mmogo le gore ke eng se o tshwanetseng go se dira gore o bone ditirelo tseo, emelela baagi ba ba leng mo tlalelong mo lefelong le o nnang mo go lona, o se ka wa itira ekete ga o bone sepe fa dilo tse di tswileng mo tseleng di diragala fa pele ga matlho a gago, fa motho a tlhorontshiwa fa pele ga gago, fa mosadi a boga fa pele ga gago, fa magodu a senya fa pele ga matlho a gago, ka jalo begela ditheo tsa molao tse di maleba ka ditiragalo tsa mothale ono tsotlhe. 

O tshwanetse go nna le seabe mo setšhabeng le go abelana tshedimosetso e e tla thusang go thibela gore maemo a se tswe mo taolong, go naya motlhala, bolelela setšhaba fa go na le mafelo a o a itseng mo motseng a go diriwang botlhokotsebe mo go ona kgotsa fa mo motseng go na le digongwana tse di tlholang di bogisa baagi, ditiragalo tsa mothale ono o ikuelwa gore o di bege kwa dikantorong tse di maleba, kwa diteišeneng tsa mapodise, le kwa baeteledipeleng ba setšhaba gore go bonwe tharabololo. 

3. Leano la ICVPS le tla tsenngwa jang tirisong?

Leano la ICVPS ka bolona ke leano la go tsenya tirisong tiro e e tlhalositsweng. Le na le mananeo a a tlhalosang ditiro le maikarabelo a a tla rwalwang ke mongwe le mongwe yo a tla nnang le seabe sa go le tsenya tirisong. Le tlhoka gore mo maphateng otlhe a puso go kopanngwe ditlhogo fa go logiwa maano le fa go beelwa matlole kwa thoko a go phethagatsa tiro eno mmogo le fa go thapiwa batho, mme tiro eno ya go kopanya ditlhogo e tshwanetswe gape le go akaretsa le maphata otlhe a puso a a nang le seabe mmogo le otlhe a mo setšhabeng gore a kopane a dire tiro eno mmogo. Go tlhokega gape le dintlha tse di tlhamaletseng tse di supang gore fa go twe tiro e dirilwe ke fa go le jang, mme dintlha tseno di tshwanetse di nne le dikgato tse di tshwanetsweng go latelwa go disa le go sekaseka tiro e e dirilweng gore go kgonwe go bona fa maemo a ditiragalo tsa botlhokotsebe a fokotsega le fa a gakala.

4. Re tlile go dira jang go netefatsa gore go tsenngwa tirisong ga ICVPS go re tswela mosola? 

Re tla tlhoma leitlho ICVPS ka go lekola gore e fokotsa ditiragalo tsa botlhokotsene, e tlhola ditiro tse dingwe gape mo godimo ga tse di leng teng mmogo le ka go tlisa tlhabologo mo mafelong a ka fa nageng. Re tla ikuela mo go ba Lefapha la Tiromaano, Tekolo le Tshekatsheko ya Tiro (DPME) go dira bonnete jwa gore mo diteng tsa Leano la go Tsamaisa Tiro ya Pakagare (MTSF) kgotsa tsa Leano la go Tlisa Tlhabologo la Pakagare (MTDP) go tsenya gape le dikgato tsa maemo a a kwa godimo tsa go supa kgatelopele e leng selo se se tla dirang bonnete jwa gore ICVPS e tsenngwa tirisong mmogo le go netefatsa gore lefapha lengwe le lengwe le rwala maikarabelo. 

Tse dingwe tsa didirisiwa tse di dirisiwang mo tirong ya go lekola le go sekaseka tiro tse di dirisiwang ke Mafapha a Diporofense a Pabalesego ya Baagi di tla thusa mo go tlhotlhomiseng gore botlhe ba ba nang le seabe ba dira se ba tshwanetseng go se dira, le go se dira ka tshwanelo. Re tlhomile Komiti ya Tiro naga ka bophara e e tla samaganang le tiro ya go rulaganya maano otlhe le ditiragalo tsotlhe tsa go bega ditiro tseo go atlegilweng mo go tsona le tseo go retetseng mo go tsona mmogo le go tla ka ditharabololo tsa go rarabolola mo go retelang.

5. Re tla netefatsa jang gore ‘puso yotlhe le setšhaba sotlhe’ di nna le seabe mo go ICVPS

Re tla sola mosola Leano la Tiragatso ya Kabo ya Ditirelo le le Ikaegileng ka Ditikologo (DDM) go le dirisa jaaka serala se se botlhokwa sa go tsenya tirisong ICVPS mmogo le go rulaganya dikgato tseno go tsenngwa tirisong mo maphateng otlhe a le mararo a puso. Dipuso tsa diporofense mmogo le dipuso tsa dimasepala di tla netefatsa gore di lepalepanya ICVPS le DDM. Dikantoro tsa Ditonakgolo le tsona di solofetswe go nna le seabe se se botlhokwa mo go rulaganyeng le mo go diseng dikgato tsa go tsenya ICVPS tirisong. Gore ICVPS e atlege mo go tsenngweng tirisong go tlhokega segolobogolo gore mongwe le mongwe mo setšhabeng mmogo le setheo sengwe le sengwe sa puso ba kopanye ditlhogo gore setšhaba sa naga ya rona sotlhe se kgone go ikutlwisa go tshela mo go renang pabalesego.