Jaaka Setheo sa Tlhokomelo ya Baagi sa Aforika Borwa (SASSA) se tswelela ka tiro ya sona ya go sekaseka lenaneo la megolo ya go thusa setšhaba, Mokaedikhuduthamagamogolo wa setheo seno, e bong Themba Matlou, o boloditse letsholo la go digela matswalo a baagi ba ba golang megolo eno mmogo le go baya dikgang ka lenaneo mo go bao ba neng ba sa tlhaloganye ka ntlha ya mmodubudu wa gore go tlhokagala eng le gore megolo e tla tswa neng.
“Ke leboga go menagane go babegadikgang le go baamogedi ba megolo ya go thusa setšhaba ka go nkadima tsebe mo ntlheng e e botlhokwa eno ya go sekasekiwa ga lenaneo la megolo ya go thusa setšhaba e SASSA e samaganeng le yona ga jaana,” Matlou o tlhalositse jalo.
“SASSA maikarabelo a yona a tswa mo Molaotheong wa Rephaboliki ya Aforika Borwa wa 1996 mmogo le a a leng mo Molaong wa SASSA, mme ona a naya setheo seno dithata tsa go tlhokomela, go laola le go duela bao ba nang le matshwanedi, megolo ya go thusa setšhaba,” o tlhalositse jalo.
Ka ntlha ya matshwenyego a a leng mo baaging mmogo le tshedimosetso ya maaka e e ka ga dikgato tseno, Matlou o gateletse gore dikgato tseno di mo molaong e bile di tshwanetswe go diriwa gore go tle go nne le bonnete jwa gore dithuso tseno di abelwa batho ba ba di tlhokang ka nnete.
“Karolo ya bo 14(5) ya Molao wa go Thusa Setšhaba o laela gore batho botlhe ba ba golang megolo eno ba tshwanetse go itsise dikantoro tsa SASSA fa e le gore go tshedimosetso nngwe le nngwe e e botlhokwa e e fetogileng mo matshelong a bona—mme seno se tsenyeletsa maemo a bona a matlole kgotsa a 'nyalo—mme seno ba tshwanetse go se dira ka bonako jo bo kgonagalang.
Maikarabelo ano a gatelelwa gape le mo lekwalong leo motho yo mongwe le yo mongwe yo a amogelang megolo eno a le neelwang fa kopo ya gagwe e sena go atlega.”
“Ka Moranang 2025, SASSA e ne ya rebola maano a yona a go sekaseka lenaneo la megolo mo pakeng ya matlole ya ngwaga wa 2025/25. Dikgato tseno di totile batho ba ba amogelang megolo eno ba maemo a bona a ka tswang e le gore a fetogile, le gore go na le kgonagalo ya gore ke mang yo a ka tswang a sa tlhole a na le matshwanedi a go ka amogela megolo eno” o tlaleleditse jalo.
Matlou o tlaleleditse ka gore dikgato tseno tsa go sekaseka lenaneo la megolo ke selo se se diriwang ka gale e bile ke karolo ya pholisi.
“SASSA ka gale e a tle e dire dikgato tsa go sekaseka lenaneo la megolo go ya ka Molawanataolo wa bo 30 wa Molao wa go Thusa Setšhaba. Dikgato tseno di botlhokwa mo go netefatseng gore motho yo mongwe le yo mongwe yo a golang mogolo wa go thusa setšhaba o santse a na le matshwanedi a gore a tswelele pele go gola go ya ka maemo a bona a ga jaanong.”
O ganeditse gape le mabarebare a gore megolo e fokoditswe.
“SASSA e kopa go baya ka tlhamalalo ntlha ya gore ga go megolo ya go thusa setšhaba e e emisitsweng kgotsa e e kgaotsweng. Megolo yotlhe e e amogetsweng semmuso e santse e le mo molaong mme e tla tswelela go duelelwa.”
Go dira gore thulaganyo eno e tsamaisane ka go tshwana, SASSA e fetotse letsholo la yona la go duelela megolo.
“Mo ngwageng ono re buletse gape le lengwe la letlha la bone la matlha a go duelela megolo.
Batho botlhe ba ba golang megolo ba ba nopotsweng mo thulaganyong ya go sekaseka maemo a bona ba tla bona megolo ya bona ka letsatsi le lengwe le le lengwe la bo 4 mo kgweding,” o tlhalositse jalo. “Seno se tla netefatsa gore batho bano ba rebolelwa megolo ya bona morago ga gore go garelwe thulaganyo ya go sekaseka maemo a bona, mme seno se tla netefatsa gore dikgato tseno tsa go sekaseka lenaneo la megolo ga di sitise matsatsi a ba bangwe a go lata megolo ya bona.”
Matlou o ikuetse mo bathong botlhe ba ba amogelang megolo eno gore ba se tshoge sepe.
“Batho botlhe ba iseng ba romelwe melaetsa e bile gape ba santse ba tswelela go amogela megolo eno ka matsatsi a ba tlwaetseng go amogela ka ona (magareng ga letsatsi la bo 2 le la bo 5 la kgwedi e nngwe le e nngwe) ga go tlhokagale gore ba ikgolaganye le setheo sa rona.”
O ikuetse gape mo bathong botlhe ba ba amogelang megolo gore ke maikarabelo a bona go begela setheo ka e nngwe le e nngwe ya diphetogo tse di nnang teng mo matshelong a bona.
“Motho yo a amogelang megolo go a kgonagala gore ka nako e a neng a dira kopo o ne a na le matshwanedi a go amogela megolo, mme jaanong maemo a bona a matlole a ka tswa a fetogile.
Seo ke maikarabelo a bona go itsise SASSA ka diphetogo tse di ntseng jalo,” o garetse ka go rialo.
Go bona tshedimosetso ka botlalo, etela webesaete ya www.sassa.gov.za kgotsa o ba letsetse mo mogaleng yo o sa duelelweng wa: 0800601011.
Email
Facebook
Twitter
WhatsApp