Ba Setheo sa Proudly South African, ka go dirisanammogo le ba Lefapha la Kgwebisano, Intaseteri le Dikgaisano tsa Dikgwebo (dtic), malobanyana ba thankgolotse serala sa go reka le go rekisa ditirelo le ditlhagisiwa mo inthaneteng mme maitlhomo a sona ke go thusa setšhaba le dikgwebo go reka le go rekisa ditlhagisiwa le ditirelo tse di tswang ka fa nageng.
Serala seno sa go reka le go rekisa ditirelo le ditlhagisiwa mo inthaneteng mo teng ga sona se na le lebentlele le le golaganyang bagwebi le bareki le le bediwang Shop Proudly SA, mmogo le lebentlele le le golaganyang bagwebi le bagwebi ba bangwe (B2B) le le bediwang Market Access Platform (MAP).
MAP e naya bagwebi ba ba batlang go reka ditlhagisiwa mo dikgwebong tse kgolo—segolo jang bao ba batlang go dirisana le dikgwebo tsa ka fa nageng—go ka kgona go fitlhelela dikgwebo di feta di le 2 000 tse di tlhomamisitsweng semmuso mo diintasetering ka mefuta ya tsona, mme tsotlhe di neseditswe pula ke ba Proudly South African.
Ka fa letlhakoreng le lengwe, Shop Proudly SA e thusa bareki go reka dithoto le ditirelo tsa ka fa nageng bonolo mo seraleng se se femelesegileng, mme tsotlhe di fitlhelwa mo seraleng se le sengwe mo inthaneteng mme se se tlhokagalang fela mo go wena ke gore o tobetse mme o tsene mo go sona.
Mokaedikhuduthamagamogolo wa Proudly South African e bong Eustace Mashimbye o tlhalositse gore dikgato tsa go thankgolola dirala tseno maitlhomo a tsona ke go thusa go fokotsa dipalopalo tse di boitshegang tsa dikgwebopotlana le tse dikgolonyana tsa naga ya Aforika Borwa tse di phelang di phutlhametse ruri.
“Re dumela gore dikgwebo tsa go rekisa dithoto le ditirelo ka inthanete di na le bokgoni jo bontsi jwa go fedisa dikgwetlho tse di tlwaelegileng mo dikgwebong mmogo le bokgoni jwa go bulela dikgwebo mmogo le bareki ditšhono tse dintšhwa. Ka dikgato tseno, re sola mosola molemo wa thekenoloji go dira gore e kgone go thusa dikgwebo tsa ka fa nageng go rekisiwa ka bontsi mmogo le go thusa ditlamo tse di tlhagisang dikuno le mafaratlhatlha go di kgontsha gore di kgone go tlhola ditiro ka fa nageng,” o tlhalositse jalo.
O tlaleleditse ka gore maitlhomo ke go dira gore go nne bonolo mo bareking mmogo le mo barekising go dirisa serala seno fa ba batla go reka mo ditlamong tsa ka fa nageng, fa ka fa letlhakoreng le lengwe seno se tla thusa gore ba kgone go fitlhelela seo ba batlang go se reka.
Mashimbye o nopotse gape le gore mosola yo mongwe gape wa Shop Proudly SA mmogo le wa MAP ke gore o naya batho ba ba itlhamelang dikgwebo ditšhono tsa go kgona go godisa dikgwebo tsa bona ka go rekisetsa maraka o mogolo le o o seng mo kgaolong eo ba leng mo go yona—mme seno ba kgona go se dira ntle le go senya madi ba re ba aga mabentlele a mangwe kwa mafelong a a rileng.
Tona ya Merero ya Kgwebisano, Diintaseteri le Dikgaisano Rre Parks Tau le ena o dumelane le seno ka gore:
“Dirala tseno di tla thusa Dikgwebopotlana, tse Dikgolwane le tse Dikgolo (di-SMME) gore di kgone go gola, di kgone go rekisa dithoto le ditirelo tse di tswang ka fa nageng, mme di kgone go tlhola ditiro tse di tlhokagalang tse e leng tlhobaboroko, e leng seo se tla dirang gore ikonomi ya naga ya rona e kgone go ntsha ga tshwene.”
Go dirisa Shop Proudly SA, etela webesaete ya: www.shop.proudlysa.co.za
Go bona tshedimosetso ka botlalo ka ga MAP, etela: www.proudlysa.co.za
Email
Facebook
Twitter
WhatsApp