Mo mogoteng wa letsatsi la mariga, dithabana tsa porofense ya Mpumalanga tse di neng di le mo bodutung di ne di bogetse maAforika Borwa jaaka ba ne ba tswile ka makatlanamane go ya go laelana le Motlatsamoporesitente wa mo malobeng Rre David ‘DD’ Mabuza.
Motlatsamoporesitente wa mo malobeng, malobanyana moragonyana ga gore a bobole sebakanyana se se khutshwanyana, o ne a thula botala ka tlhogo a na le dingwaga di le 64. O fitlhilwe kwa diphupung tsa ba lelapa la gagwe kwa Barberton, kwa porofenseng ya Mpumalanga.
Fa a ne a eme batlaphitlhong ka lefoko, Moporesitente Cyril Ramaphosa o ne a tlhalosa fa kopano eo e tlisa khutsafalo e leng segakolodi se se tshwanetseng go re gakolola gore re ipatle re ipatlisise.
“Gompieno re kokoane fano ka kutlobotlhoko e e seng kana ka sepe go tla go bontsha tlotlo go botshelo jwa monna yo, ka ditsela tse dintsi, a nnileng le seabe se segolo mo botshelong jwa temokerasi ya naga ya rona ya Aforika Borwa. E bile gape re kokoane fano le go tla go keketa botshelo jwa morwa yo gape e neng e le rre wa setšhaba sa porofense ya Mpumalanga.
“Se moeteledipele yono wa naga ya rona yo gape e neng e le mokaulengwe wa rona, rre David Dabede Mabuza, a tla gopolwang ka sona ke tiro ya gagwe eo a e diretseng setšhaba, mme seno ke sona se a tla tlholang a gopolwa ka sona go ya go ile. Rre David Mabuza— yo ba neng ba rata go mo bitsa DD—e ne e le moeteledipele yo a tumileng e seng fela mo porofenseng eo a tswang kwa go yona mme gape le mo nageng ka bophara” o tlhalositse jalo.
Radipolotiki yono yo a belegweng kwa porofenseng ya Mpumalanga—yo e neng e re fa ba mo boka ba bo ba re ke “DD” kgotsa “The Cat”—e ne e le morutabana ka dithuto. Le fa go le jalo, go ise go ye kae o ne a iphitlhela a setse a le mo dipolotiking a lwela ditshwanelo tsa batho mme kwa bofelong a feletsa e le modiredi wa setšhaba.
Rre Mabuza go tseneng ga gagwe mo tirelong ya setšhaba go simolotse ka ngwaga wa 1994 kwa porofenseng ya Mpumalanga, ke teng mo a neng a tsenya tlhogo a dira jaaka Mokhuduthamaga mo maphateng ka go farologana a ona. Mo tsamaong ya nako o ne a feletsa e le Tonakgolo ya porofense ya Mpumalanga ka ngwaga wa 2009 pele a ka tlhophiwa go ya kwa palamenteng e leng teng koo a neng a thapiwa go nna Motlatsamoporesitente ka ngwaga wa 2018.
“O diretse setšhaba sa rona jaaka Motlatsamoporesitente wa Puso ya Naga ya rona, jaaka Tonakgolo ya Puso ya Porofense ya Mpumalanga, mmogo le go nna Motlatsamoporesitente wa mokgatlho wa gagwe wa dipolotiki e leng African National Congress (ANC).
“Fa a ne a dira jaaka Tokololo ya Palamente mmogo le jaaka Moeteledipele mo Tirong ya Puso, o ne a ipontsha gore ke radipolotiki yo a tlotlegang yo a nang le maano a a ganang go fela, ka gale o ne a itse go thepogela dikgwetlho tse di boima tse di a tleng di runye magareng ga ditokololo tse di rometsweng kwa palamenteng.
“Gotlhe fo a fetileng o ne a tlhalosiwa jaaka motho yo o maanomaano, yo o ka se tsogileng o itsitse gore o eme fa kae, yo gape a neng a sa gatoge mo go seo a emeng mo go sona fa go tla mo go direng gore maemo a laolege le mo go direng gore batho ba tshwaragane,” Moporesitente Ramaphosa o tlhalositse jalo.
Fa Moporesitente a tsweletse go ema batlaphitlhong ka lefoko, matšhwititšhwiti a setšhaba mo mebileng ya Mbombela, a ne a dirile melamela ya go bontsha tlotlo mo sejanaga se se rweleng Motlatsamoporesitente wa mo malobeng se tlileng go feta teng fa se leba kwa diphupung tseo a tlileng go fitlhwa kwa go tsona mo motseng wa porofense ya Mpumalanga.
“O ne a itumela thata fa a ne a na le batho ba rona. Ga a ise a ke a itlhokomolose bona. Ga a ise a ke a itlhokomolose setšhaba sa rona.
“Fa e sale go begiwa gore o ithobaletse, re bone matšhwititšhwiti a batho a tshologela kwa lapeng la ga DD kwa Barberton go tlisa matshediso, re bua ka batho fela, magosi, mmmogo le mefuta ka go farologana ga yone ya batlhankedi ba dipolotiki. Seno se bontsha ka fao e neng e le motho wa batho ka teng. Seno se bontsha ka fao a neng a kgona go dira gore setšhaba sa porofense ya gagwe se tshwaragane ka teng.
“Yo e ne e se monna wa boikgogomoso yo a ratang go tsenela mekete ka mekete ya batho ba maemo a a kwa godimo. O ne a ipatlela go phela le batho ba rona, a reetse mathata a ba nang le ona mmogo le go thusa go tokafatsa matshelo a bona,” Moporesitente Ramaphosa o nopotse seno.
O nopotse gape le gore rre Mabuza o re tlogeletse lefa la “go itlwaetsa go tsibogela ka bonako merero e e lebaganeng le kabo ya ditirelo”.
Go tshwarisana tiro
Moporesitente Ramaphosa o gakologelwa mo dingwageng di le tlhano tse di fetileng fa ene le rre Mabuza ba ne ba okame maemo a boeteledipele mo nageng ya Aforika Borwa fa ene e ne e le Moporesitente mme yo mongwe e ne e le Motlatsamoporesitente.
“Ka nako eo ke teng mo ke neng ka bona gore motho yo o itse se a se tletseng. O ne a ikanyega, a tshepagala, e ne e le motlatsamoporesitente yo a neng a dira tiro e e tswileng diatla.
“Fa e ne e le Moeteledipele mo Tirong ya Puso kwa Palamenteng, o ne a dira bonnete jwa gore thato ya setšhaba e iponagatsa mo melaong ya naga ya rona mmogo le mo matsholong a puso e samaganang le ona.
“Mo maikarabelong a gagwe otlhe a go nneng Motlatsamoporesitente—go simoloa ka maikarabelo a pusetso ya dinaga go feleletsa ka maikarabelo a go phethagatsa merero ya Mogare wa Lebolelateng (HIV) le Lebolelateng (AIDS), maikarabelo a go phethagatsa matsholo a go lwantshana le tshokolo go fitlha ka a go lwela ditshwanelo tsa bagale ba sesole—fa go tla mo go rre David Mabuza o ne o ka ikanyega mo go ene.
Go ya go ile re tla mo gopola ka gore o ne a itsi go dira gore batho ba tshwaragane,” Moporesitente Ramaphosa o garetse jalo. – SAnews.gov.za
Email
Facebook
Twitter
WhatsApp