Bindu iḽi ḽa fhaḽa Krugersdorp ḽi khou shandukisa zwithu kha FMCG

U bva kha kuthomele kwa fhasisa fhaḽa Munsieville, Krugersdorp, Global Insync yo aluwa ya vha ḽiṅwe ḽa mabindu a fulufhedzisaho vhukuma kha ḽa Gauteng ane a langwa nga vhafumakadzi, ḽine ḽa khou ḓiitela dzina kha sekithara ya zwishumiswa zwa vharengi zwine zwa vha na ṱhoḓea khulwane.

Iyi khamphani ye ya thomiwa nga ṅwaha wa 2018 nga ramabindu Xolile Khumalo, ndi yone haya ha zwibveledzwa zwivhili zwine zwa khou aluwa nga luvhilo: Peaches Cosmetics, ine ya vha ya mutevhe wa zwibveledzwa zwa ndeme zwa u ṱhogomela vhana zwo itwaho nga nḓila ine ha zwa dzhiela nṱha vhulenda na tsireledzo, na Crysta Clean, ine ya vha ya mutevhe wa mishonga ya u kunakisa mahayani yo itelwaho u shumiswa ḓuvha ḽiṅwe na ḽiṅwe.

Khumalo u ṱalutshedza uri bindu a ḽo ngo thoma sa bindu ḽa u bveledza zwithu.

"Ri bveledza zwibveledzwa zwine zwa wela nga fhasi ha FMCG. Zwazwino ri na mifuda mivhili ya zwibveledzwa, zwine khazwo ha katelwa zwibveledzwa zwa zwiḓolo zwa ṱhogomelo ya vhana. Ri dovha hafhu ra vha na mufuda wa zwibveledzwa zwa u kunakisa ngomu mahayani," vho ralo. “Ro thoma nga ṅwaha wa 2018. Phanḓa ha musi ndi tshi thoma bindu iḽi, ndo ranga nga u khunyeledza khoso dza vhubveledzi nga Yunivesithi ya Johannesburg.”

Mathomoni, Global Insync yo vha i tshi shuma sa khamphani ya tshumelo dza u kunakisa na u lugisa zwithu, nga maanḓa i tshi shuma fhaḽa kha vhupo ha nnḓu dza ḓoroboni na zwifhaṱo zwa dziofisi.

Ndi nga tshenetshi tshifhinga he Khumalo a kona u vhona afho hune ha vha na ṱhoḓea – khathihi na tshikhala.

“Musi ndi tshi tou fhedza u ṱhaphudza pfunzo dzanga, ro mbo ḓi dzhena kha zwa u bveledza zwibveledzwa zwashu zwa u kunakisa ngauri, mathomoni, musi ndi tshi thoma khamphani iyi, yo vha i khamphani ya u kunakisa na u lugisa zwithu. Ro vha ri tshi khou shumela kha vhupo ha dzinnḓu dza dziḓoroboni na u kulumaga dziofisi.” Nga tshenetsho tshifhinga, ndo swika he nda kona u zwi vhona uri ro vha ri tshi khou shumisa mishonga minzhi ya u kulumaga. Ndo ya fhaḽa UJ u guda nga ha uri ri maga hani zwibveledzwa, na uri musi ndi kati na ngudo dzenedzo, ndo mbo ḓi pfa ndi tshi thoma u takalela mushumo wa vhumagi.”

Tswikelo iyo yo fhedza he ya mbo ḓi shanduka ya vha tshiṅwe tshithu tshihulwane. Musi vhaṱaṱisani vha tshi khou bveledza zwishumiswa zwa u kunakisa zwo ḓoweleaho kana zwiḓolo, Khumalo o vhona ṱhoḓea i sa athu swikelwaho kha maraga zwibveledzwa zwa u ṱhogomela vhana.

U shumisa maitele a tshumisano nga nḓila yo fhelelaho

“Vhathu vha khou bveledza zwishumiswa zwa u kunakisa kana u ita zwiḓolo. Ho vha hu na tshikhala kha zwibveledzwa zwa vhana, ngauralo.

Ndo shumisana na Yunivesithi ya Thekinoḽodzhi ya Tshwane. Ndo vha vhudza uri ndi nga takalela u ḓidzhenisa kha zwa u bveledza zwishumiswa zwa vhana. U thoma kha u bveledza, u vhumba na u linga, zwo dzhia miṅwaha ine ya swika mivhili uri tshibveledzwa tshi vhe tsho lugela u shumiswa,” vha a talutshedza.

Ṋamusi, mvelelo dzi a ḓiambela. Mutevhe wa zwiḓolo zwa vhana wa Peaches Cosmetics – une wa katela luphuse lwa vhana, vaseḽina na mapfura a u ḓola muvhili – zwoṱhe zwi a wanala mavhengeleni a Dis-Chem Baby City shango ḽoṱhe, kha Amazon, nahone zwi dovha hafhu zwa wanala kha mavhengele maṱanu a ha Checkers ngei Krugersdorp na ḽithihi ngei Pretoria.

Zwa u rengisa nga inthanethe zwo vha iṅwe thikho ya ndeme. "Amazon yo ri itela mushumo muhulu. Zwazwino ri zwiṅwe zwa zwibveledzwa zwine zwa khou rengwa vhukuma mavhengeleni avho.  Hezwo zwi khou ri thusa vhukuma kha khunguwedzo."

Khumalo o ḓadzisa hafhu nga ḽa uri mutevhe uyo u khou engedzea: “Hu si kale ri ḓo ḓivhadza mapfura a aqueous cream na tshiluḓi tsha u ṱamba muvhili tsha ṅwana.

Nyaluwo ya khamphani

Thikhedzo i bvaho kha muvhuso na mazhendedzi a zwa mveledziso na yone yo shela mulenzhe kha nyaluwo ya khamphani.

Nga ṅwaha wa 2021, Dzangano ḽa Mveledziso ya Mabindu Maṱuku (Seda), ḽine zwino ḽa vho ḓivhiwa sa Dzangano ḽa Mveledziso ya Mabindu Maṱuku na zwa Masheleni (Sedfa), ḽo thusa khamphani ya Global Insync u wana zwishumiswa zwa ndeme zwa u maga zwine zwa vha na mutengo wa R250 000, hu tshi katelwa na thannga ya u ṱanganyisela, mutshini wa u khouda wa dzibetshe na wa u putela. Khamphani iyi ndi ine zwazwino ya khou shuma u bva fhaḽa Sentharani ya Lepharo ine ya vha fhaḽa Munsieville nahone i thola vhathu vha sumbe.

Khamphani iyi yo dovha hafhu ya lavhelesa kha maraga ya ḽifhasi. Nga thikhedzo i bvaho kha Muhasho wa Mbambadzo, Nḓowetshumo na Muṱaṱisano (dtic), Khumalo yo no shela mulenzhe kha maṱano a dzitshaka.

Vho penndela nga uri: “Nga ṅwaha wa 2024, ndo ya kha ḽa China u dzhenela ṱano na u ṱoḓa zwishumiswa, nda dovha nda ya na kha ḽa Algeria u dzhenela Ṱano ḽa Mbambadzo ya Vhukati ha Mashango a Afrika. Hu na maraga wa zwibveledzwa zwa Afrika Tshipembe; vhathu vha funa zwibveledzwa zwashu, nga maanḓa u mona na dzhango ḽa Afrika.”

U wana zwidodombedzwa zwinzhi nga ha Peaches Cosmetics, kha vha founele kha 079 129 6881, 061 496 5590 (WhatsApp), kana vha rumele imeiḽi kha info@globalinsync.co.za kana vha dalele Sedfa kha www.sedfa.org.za