Ḽitambwa ḽi ḓivhiwaho sa Nongqawuse ḽi vhuyelela hafhu ngei Joburg Theatre

Joburg Theatre i khou ḓo vula mbekanyamushumo yayo ya ṅwaha wa 2026 nga ḽitambwa ḽiswa ḽi takadzaho vhukuma ḽine ḽa khou dovholola u amba hafhu nga ha tshiṅwe tsha zwiwo zwa kale zwa Afrika Tshipembe zwe zwa vhuya zwa ambiwa nga hazwo vhukuma. The Rise and Fall of the African Gospel: Nongqawuse ḽine ḽa vha ḽitambwa ḽe ḽa sikwa, u ṅwalwa na u rangwa phanḓa nga mubveledzi wa matambwa a ḓivheaho Vho Mbongeni Moroke ḽi ḓo vha ḽi tshi khou sumbedzwa u bva nga ḽa 30 na ḽa 31 Phando 2026 fhethu ha bvumo nahone hu ḓivheaho vhukuma fhaḽa Braamfontein.

Ḽitambwa iḽi ḽi vusulusa hafhu zwiwo zwe zwa bvelela nga miṅwaha ya 1856/57, musi vhuporofita ha musidzana muṱuku wa MuXhosa, Nongqawuse, vhu tshi ita uri hu vhe na u vhulahwa ha kholomo nnzhi zwe zwa fhedza zwo vhaisa vhukuma lushaka lwa Ma-Xhosa.

Ḽitambwa ḽa Moroke ḽi ṋea tshikhala tsha u ṱoḓulusisa hafhu uyu muporofita wa musadzi muswa, a ḽi tou mu sumbedzisa fhedzi sa muthu wa ḓivhazwakale, ḽi dovha hafhu ḽa mu bvisela khagala sa mubvumbedzwa a konḓaho ane a khou tshimbila kha lwendo lwa zwa muya, mvelele na mitsiko ya ḽifhasi ḽine ḽa khou shanduka nga u ṱavhanya.

Muṅwe we na ene a sumbedziswa kha ḽitambwa ḽeneḽi ndi Tiyo Soga, mufunzi wa u tou thoma wa Murema u vhewa kha Kereke ya Presbyterian. U dzheniswa hawe zwo engedza vhudzivha kha mafhungo, zwa ombedzela phambano na u ṱangana zwine zwa vha hone vhukati ha sisṱeme dza lutendo dza Afrika na ṱhuṱhuwedzo ya vhurereli ha Vhukovhela ine a khou bvelela nga tshifhinga tsha tshanduko khulwane ya matshilisano.

Vho Moroke, vhane vha vha mulanguli, muṅwali, mubveledzi na muimbi wa Afrika Tshipembe, vha ḓivhelwa nga maanḓa u vusuludza mafhungo a vhukuma a Afrika na u vhuedzedza tshirunzi kha ḓivhazwakale ya phanḓa ha zwa vhukoloni.

Nga kha khamphani yavho ya u bveledza matambwa, Africa-Creations, vho bveledza mishumo ine ya khoḓiwa vhukuma sa The Spirit King nahone vha khou bvela phanḓa na u itela khaedu nḓila yo khakheaho ine ḓivhazwakale ya khou sumbedziswa ngayo ngeno nga thungo vha tshi khou pembelela mafhungo a zwa tshimuya a Afrika.

Mushumo wavho u ṱanganya theatre, muzika na u anetshela zwiṱori zwa mvelele u itela u ṱumanya hafhu vhathetshelesi na vhufa vhune kanzhi ha dzhielwa fhasi kana ha sumbedzwa nga nḓila i si yone.

Thikhithi dza ḽitambwa ḽa The Rise and Fall of Gospel of Africa: Nongqawuse dzi khou wanala nga mutengo wa R200 nahone dzi wanala mavhengeleni a Pick n Pay, kha mabogisi a theatre ya Joburg na kha inthanethe nga kha Webticket.

Joburg Theatre (SOC) Ltd – tshiimiswa tsha masipala wa Ḓorobo khulwane ya Johannesburg – tshi khou bvela phanḓa na u shela mulenzhe muhulwane wa u ṱuṱuwedza vhutsila na mvelele afho ḓoroboni. Musi vho ṱangana na vha Soweto Theatre na Roodepoort Theatre, vha vhumba tshipiḓa tsha sekithara ya zwa Mveledziso ya Tshitshavha ya ḓorobo khulwane, ine ya langa mishumo na u vhona uri matambwa a maimo a nṱha ḽifhasi a khou dzula a tshi kona u swikelea nga vhaṱaleli vha Johannesburg. 

U wana mafhungo nga vhuḓalo, kha vha dalele www.joburgtheatre.com

The Rise and Fall of the African Gospel: Nongqawuse will be staged at the Joburg Theatre on 30 and 31 January 2026