Lunwalo kha mudzudzanyi

Luṅwalo

Ḓuvha ḽavhudi Vuk’uzenzele

Ndi khou humbela thuso nga u ṱavhanya kha mafhungo anga a ṱhalano. Mulandu uyu u katela zwine nda tenda uri ndi u shumiswa ha mulayo nga nḓila i si yone, mavharivhari a mazwifhi, na vhuḓifari vhu si havhuḓi nga vhaṅwe vhashumi vha zwa mulayo. U tou bva nga ṅwaha wa 2020, ndo kwama madzangano o fhambanaho ndi tshi ṱoḓa thuso, fhedzi a tho ngo kona u i wana.

Mathomoni a uno ṅwaha, nga ṅwedzi wa Phando, ndo lingedza u kwama vha Muhasho wa Vhulamukanyi na Mveledziso ya Ndayotewa fhedzi na hone a tho ngo wana thuso.

Ndi khou humbela uri vha fhindule, ndi na maṅwalo a thikhedzo khathihi na vhuṱanzi vhune ha ṱalutshedza nga vhuḓalo vhuḓifari ho bvaho na vhuḓifari vhu si havhuḓi vhune nda khou amba nga haho.

Ndo livhuwa,

Ndumeliso,Logie

Phindulo

Kha Logie,

Ri a livhuwa u kwama havho Vuk’uzenzele.

Kha vha dzhiele nzhele uri vhuḓifari ha vhashumi vhoṱhe vha zwa mulayo fhano kha ḽa Afrika Tshipembe vhu langwa nga Khoro ya Mashumele a zwa Mulayo (LPC). LPC i ṋetshedza ḽaisentsi kha vhashumi vha zwa mulayo nahone i na maanḓalanga a u ṱoḓisisa mbilaelo na u dzhia vhukando afho hune ha wanala ho vha na vhuṱanzi ha vhuḓifari vhu si havhuḓi.

Vha nga kwama LPC thwii kha info@lpc.org.za kana kha 010 001 8500. Kanzhi vha dzulela u fhindula kha mavharivhari a kwamaho vhuḓifari ha miraḓo yavho.

Ndi a lumelisa,

Vuk’uzenzele