Vha nga fhungudza hani vhuleme havho ha zwa masheleni kha ṅwedzi wa Phando

Dzangano ḽa Zwikolodo ḽa Afrika Tshipembe (CASA) ḽi khou ṱuṱuwedza vharengi uri vha dzhie tsheo dzo teaho nahone dzine dza sumbedza vhuḓifhinduleli dza nga ha zwikolodo nga u hadzima masheleni fhedzi arali zwo tea nahone kha vhaṋetshedzi vha tshumelo dza zwa masheleni vho ḓiṅwalisaho na Mulanguli wa Zwikolodo wa Lushaka (NCR) fhedzi.

Ṅwedzi wa Phando ndi ṅwedzi une kanzhi wa lemela vhukuma kha zwa masheleni nahone u kona u ḓivha nḓila ya kulangele kwa masheleni na zwikolodo zwi nga vha thusa u dzikisa tshiimo tsha masheleni avho kha uno ṅwaha.

Zwithu zwi ngaho u shumisa masheleni nga tshifhinga tsha holodei, madalo, vhuṱambo ha zwa matshilisano, mbadelo dza tshikolo, na vhuḓifhinduleli ha muṱa vhune ha dzulela u bvela phanḓa zwi nga sia miṱa minzhi yo shumisesa masheleni manzhi kha uno ṅwedzi wa Phando.

Vho Leonie van Pletzen vho ri: “Tshikolodo tshi nga vha tshishumiswa tshi thusaho, arali fhedzi tshi tshi khou shumiswa nga nḓila yo tsireledzeaho, nga vhuḓifhinduleli na kha vhaṋetshedzi vho ḓiṅwalisaho vhane vha tevhedza mulayo na u tsireledza vharengi,” hu amba muofisiri muhulwane wa CASA.

Ngeletshedzo idzi dzi shuma sa tsumbanḓila ya u vha thusa u tsireledza vhuimo havho ha zwa masheleni:

1. Kha vha ite mugaganyagwama u pfalaho wa ṅwedzi wa Phando. 

Kha vha ite nzudzanyo dza ndeme dza kushumisele kwavho kwa masheleni u fana na: mbadelo dza tshikolo, zwiḽiwa, vhuendedzi, mbadelo dza hayani, u badela zwikolodo hu tshi katelwa na dziṅwe mabadelo dzo teaho dzine dza tea u badelwa mathomoni a ṅwaha.

2. Kha vha hadzime masheleni fhedzi arali vha tshi ḓo kona u a badela murahu. 

Phanḓa ha musi vha tshi nga dzhia tshikolodo, kha vha ṱanganyele mbadelo dzoṱhe dzine vha tea u dzi ita nga ṅwedzi vha dovhe vha ṱole arali dzi tshi tenda u katelwa zwavhuḓi kha mugaganyagwama wavho nga murahu ha musi vho no ita mbadelo dzavho dzoṱhe dza ndeme dza nga misi.        

3. Kha vha hadzime fhedzi kha vhaṋetshedzi vha zwikolodo vho ḓiṅwalisaho kha NCR. 

Tsireledzo yavho ndi ya ndeme. Muṋetshedzi wa tshumelo dza zwa masheleni o ḓiṅwalisaho kha NCR u tea u tevhela mulayo, u ṱalutshedza mbadelo dzoṱhe, na u vha fara nga nḓila yo teaho.

4.Kha vha vhee phanḓa zwithu zwa ndeme zwine vha tea u zwi badela. 

Kha vha vhone uri mbadelo dzavho dza henefho muṱani, mbadelo dza tshikolo, vhuendedzi, na mugaganyagwama wa zwiḽiwa zwo badelwa musi vha sa athu humbula nga ha u shumisa masheleni kha zwiṅwe zwithu.

5. Kha vha vhale vha pfesese thendelano yavho ya tshikolodo.

Phanḓa ha musi vha tshi nga saina ḽiṅwalo ḽifhio na ḽifhio, kha vha vhe na ngoho ya uri vha khou pfesesa zwi tevhelaho nga nḓila yavhuḓi: nzwalelo dzoṱhe nga vhuḓalo masheleni oṱhe na dziṅwe mbadelo dza nga nṱha maḓuvha a u badela murahu na masheleni a tshitolomennde ndaṱiso dza u lenga u badela kana u pfuka mbadelo vha songo vhuya na saina thendelano ine vha sa i pfesese zwavhuḓi.

6. kha vha tsireledze maṅwalo avho na zwidodombedzwa zwa bannga.

Muṋetshedzi wa tshumelo dza zwikolodo ane a vha mulayoni a nga si vhuye a humbela u vhulunga ḽiṅwalo ḽavho ḽa vhuṋe, garaṱa ya bannga kana garaṱa ya vha Zhendedzi ḽa Tsireledzo ya zwa Matshilisano ḽa Afrika Tshipembe. Arali izwo zwi tshi nga swika hune zwa nga humbelwa, kha vha mbo ḓi ṱutshela fhethu afho nga u ṱavhanya — a zwiho mulayoni.

Vho vha vha tshi zwi ḓivha?

CASA ndi dzangano ḽihulwane ḽa fhano Afrika Tshipembe ḽine ḽa imela vhaṋetshedzi vha zwikolodo vhane vha si vhe bannga vha re na vhuḓifhinduleli nahone vhane vha shuma nga nḓila ya phurofeshenaḽa. CASA yo vha hone u itela u ṱuṱuwedza maitele a u hadzima masheleni nga nḓila ya vhuḓifhinduleli, u tikedza nḓowetshumo ya zwikolodo i bvelaho phanḓa zwavhuḓi, na u shela mulenzhe kha nyaluwo ya ikonomi khathihi na u katelwa kha zwa masheleni u mona na shango ḽoṱhe. Kha vha kwame CASA kha info@casa.co.za / (012) 346 1081