CAS i ṋetshedza tshikhala tsha vhuvhili kha zwiimiswa zwa pfunzo dza nṱha

Ṅwaha muṅwe na muṅwe, zwigidi na zwigidi zwa vhagudiswa vha maṱiriki vha dzhena kha khalaṅwaha ntswa ya pfunzo vha si na vhuṱanzi ha uri ndi ngafhi hune vha khou ḓo guda hone – kanzhi zwi tshi itiswa nga mulandu wa uri khumbelo dzavho dza u thoma a dzo ngo ṱanganedzwa kana mvelelo dzavho dza u fhedzisela dzo khwinifhadzea fhedzi nga murahu ha musi maḓuvha a u ita khumbelo o no fhira.

U itela u tikedza vhagudiswa avha, Muhasho wa Pfunzo dza Nṱha na Vhugudisi (DHET) wo ḓivhadza uri Ofisi ya Vhukati ya  u Khunyeledza Khumbelo (CACH) i vho ḓo dzhielwa vhuimo nga Ofisi ya Vhukati ya Tshumelo dza u ita Khumbelo (CAS) kha uno ṅwaha wa pfunzo wa 2026. 

DHET yo amba uri : “Muhasho u kha ḓi vha wo ḓiimisela u vhona uri a hu na muswa na muthihi ane a ḓo wanala a si na zwidodombedzwa zwo teaho, ngeletshedzo kana thikhedzo ya musi a tshi khou lingedza u wana zwikhala zwine zwa vha hone nga murahu ha u khunyeledza pfunzo dza tshikoloni.” 

U ya nga muhasho, CAS i ṋea vhagudi “thandululo ya tshifhinga tshilapfu yo fhelelaho nahone yo ṱanganelaho hune ha ambiwa nga ha tswikelo, u khwinisa zwa u kona u vhonala ha zwikhala kha sisṱeme yoṱhe ya nga murahu ha u ṱhaphudza pfunzo dza tshikoloni khathihi na u fhelisa zwiimiswa zwa vhufhura.” 

Tshumelo iyi i ḓo dovha hafhu ya sumbedza na huṅwe fhethu ho fhambanaho nga nnḓa ha yunivesithi na magudedzi o ḓoweleaho, hu tshi pfeseswa zwauri zwikhala zwine zwa vha hone zwazwino zwi nga si kone u swikela ṱhoḓea ine ya khou engedzea ya pfunzo ya nga murahu ha u ṱhaphudza tshikolo. 

Avho vhane vha khou ṱoḓa u vha matshudeni vha nga davhidzana na CAS nga WhatsAPP kha 081 308 4196. 

U tou bva nga ṅwaha wa 2013, CACH yo shuma sa thikhedzo ya ndeme, he ya thusa zwigidi na zwigidi zwa vhagudi, nga maanḓa avho vhe mvelelo dzavho dzo khwinifhadzeaho dza vha vulela mahothi e mathomoni a vha tshi ḓo vha o valea. Mathomoni a ṅwaha muṅwe na muṅwe, vhaiti vha khumbelo vha a ḓiṅwalisa vha tshi itela uri vha kone u vhonwa nga zwiimiswa zwa pfunzo dza nṱha zwine zwa khou shela mulenzhe. Yunivesithi dza muvhuso, Magudedzi a zwa Thekiniki na Mishumo ya Zwanḓa khathihi na zwiimiswa zwa phuraivethe a konaha u dzhena kha databeizi a tshi shumisa phothala ya inthanethe yo tsireledzeaho u itela u wana matshudeni vho teaho.

Musi o no konaha u wana avho vho teaho, vhagudi vha wana mulaedza nga SMS kana imeiḽi u tshi khou vha ḓivhadza uri vha ṱanganedze kana u hana tshikhala tshe vha ṋewa hune nga murahu tshiimiswa tshenetsho tsha ḓo konaha u khunyeledza maitele a u redzhisiṱara. 

Mbekanyamushumo ya Tshikhala tsha Vhuvhili tsha u ṅwala Maṱiriki

Vhagudi vhane vha khou ṱoḓa u khwinifhadza mvelelo dzavho na vhone vha nga shela mulenzhe kha Mbekanyamushumo ya Tshikhala tsha Vhuvhili tsha Maṱiriki ine ya tendela mugudi a tshi ṅwala hafhu thero dze a nanga u itela uri a kone u swikela ṱhoḓea dza u phasa Ṱhanziela ya Murole wa Nṱha ya Lushaka kana Ṱhanziela ya Nṱha. Zwazwino u ḓiṅwalisela ṅwaha wa 2026 ho vula u vhuya u swikela nga ḽa 6 Luhuhi 2026 hu tshi itelwa milingo wa ṅwedzi wa Shundunthule/Fulwi, hu nga itwa nga inthanethe kana u tou dalela w.w.w.eservices.gov.za, kha senthara ya mulingo yo tendelwaho, kana kha ofisi dza tshiṱiriki.

U wana zwidodombedzwa zwinzhi, kha vha founele kha 0800 202 933 kana vha tou rumela imeiḽi kha SecondChance@dbe.gov.za 

U itela u wana zwidodombedzwa zwinzhi nga ha u ita khumbelo kha CAS, kha vha dalele www.cas.ac.za kana vha puṱedze kha ttps://www.gov.za/sites/default/files/gcis_documents/CAS_Learner%20Guide.pdf&n…;