U ṱanganya miloro ya vha ngoho

Zwe zwa thoma sa mutambo kha Pontsho Motswane nga ṅwaha wa 2006 zwo fhedza zwo hula zwa vha bindu ḽine ṋamusi ḽa ṋea mushumo khae na vhaṅwe vhathu.

Lele’s Creation ndi khamphani ine ya vha ya Vharema 100% nahone i wanala fhaḽa Postmasburg, vunduni ḽa Northern Cape. Mushumo muhulwane une ya ita wone ndi u runga zwiambaro, u khavhisa zwiambaro, u ganḓisa khathihi na huṅwe u ganḓisa ha u tou engedza.

Makhulu wa Pontsho vho shela mulenzhe muhulwane vhukuma kha u bveledzwa na u vhumbwa ha Lele’s Creation. U bva vhuṱukuni hawe, Pontsho o thoma u vha na lufuno luhulwane vhukuma khathihi na dzangalelo ḽa u runga nga fhasi ha vhulavhelesi ha makhulu wawe, mutheo we nga murahu wa ḓo ita uri a shandukise uvhu vhukoni hawe vhu vhe mushumo une ṋamusi wa kona u vhonala.

Namusi, Lele’s Creation i na vhashumi vhararu.

“Zwiambaro zwiṅwe na zwiṅwe zwi na tshiṱori tshazwo, nahone dzina ḽa makwevho iḽi ḽo ḓitika nga maanḓa kha zwa u maanḓafhadza vhafumakadzi, u pembelela vhukoni, ṱhalusavhuṋe na maanḓa a vhafumakadzi a u ranga phanḓa na u bveledza.”

O wana thuso ya masheleni a u alusa bindu ḽawe u bva kha SEDA (ine zwino ya ḓivhiwa sa Sedfa). Thikhedzo iyi yo ita uri a kone u renga mutshini wa u ganḓisa na mutshini wa u kwanyeledza nga mufhiso a tshi shumisa masheleni e a a wana lwa u thoma.

U tou bva tshenetsho tshifhinga, vhathu vho mbo ḓi thoma u tikedza iḽi bindu ḽawe zwenezwo musi vha tshi vho thoma u vhona tshumelo dzoṱhe na zwibveledzwa zwine a zwi bveledza.

Sedfa na yone yo shela mulenzhe muhulwane vhukuma kha u kunguwedza bindu ḽawe nga u ḽi isa kha ṱano fhaḽa Sentharani ya Maṱano ya Sandton.

Puḽatifomo iyo yo ṋetshedza bindu ḽawe tshikhala tsha ndeme vhukuma tsha u ḓivhambadza na u ḓivhadza mushumo wawe kha vhathetshelesi vhanzhi. “Zwo dovha hafhu zwa vula mahothi a u ṱangana na vhaṅwe khathihi na khonadzeo ya u vhumba vhushaka ha tshumisano.”

Nga nnḓa ha zwa mabindu, Pontsho o ḓiimisela u ṋea murahu. U khou tshimbidza mbekanyamushumo yo livhiswaho kha vhaswa vho no fhedzaho maṱiriki vhane fhedzi a vha athu kona u bvela phanḓa u ya kha zwiimiswa zwa pfunzo dza nṱha.

Pontsho o amba uri: “Nga kha maga aya, vha guda u runga na zwikili zwa mutheo zwa nga ha mabindu, u vula mahothi a zwa mishumo ya tshifhinga tshi ḓaho kana u thoma mabindu avho maṱuku.”

Muloro wawe ndi u alusa khamphani yawe, u thola vhathu vhanzhi na u bveledzisa vhadizaini vha fesheni vhane vha ḓo dededzwa nga Lele’s Creation, zwoṱhe hezwi zwi tshi khou itelwa u tikedza tshitshavha na u ṋetshedza tshumelo yo khetheaho kha vharengi.

U wana mafhungo nga vhudalo nga ha Lele Creation kha vha founele 0820606217 kana vha imeile kha pontshomotswane@gmail.com kana vha dalele siatari lavho la feisibugu: Lele's Creations 

Sedfa i a kona u swikelelwa kha www.sedfa.org.za