Zwa u dzula
hawe kha lufhera lwa nga murahu ha nnḓu ya makhadzi awe ngei Mamelodi, vunḓuni ḽa Gauteng, zwo ṋea ramabindu Nick Chali muhumbulo une wa nga thusa vhaṋe vha dzinnḓu vha henefho kha tshikolobulasi tshenetsho nḓila dza u ḓiwanela masheleni u bva kha phera dzi sa shumiswi.
Kha Chali, lufhera ulwo lwo vha lu sa tou vha fhedzi fhethu ha u dzula. Zwo mu sumbedza uri vhathu vha Afrika Tshipembe vha dzimiḽioni vha dzula fhethu ho tou linganelaho hune pulatifomo khulwane dza zwa vhudzulo dza sa hu dzhiele nzhele. O vhona tshikhala tsha u shandukisa zwikhala izwi zwine zwa khou dzhielwa fhasi zwa vha ndaka dzine dza ḓisa mbuelo.
“Vhupo ha zwikolobulasi a hu tou vha fhethu ha vhudzulo fhedzi; ndi vhupo ha vhubindudzi hune ha ṱanganywa nga zwiṅwe zwithu zwine tshelede i nga si kone u zwi renga - ubuntu. Airbnb na Booking.com ndi fhethu ho fhaṱelwaho maraga wo fhambanaho,” Chali o amba ngauralo.
Nḓivho iyi yo ita uri hu vhe na Backroom Bookings, ine ya vha puḽatifomo ya vhudzulo yo thewaho kha webusaithi ine ya ṱumanya vhaṋe vha ndaka dza vhupo ha zwikolobulasi na vhaeni vhavho vhane vha khou ṱoḓa vhudzulo vhupfufhi ha vhukuma, ha Afrika Tshipembe henefho kha phera dza nga murahu ha nnḓu u ya kha nnḓu dza vhaeni.
Muhumbulo uyu wo thoma mafheloni a ṅwaha wa 2023 nga murahu ha miṅwedzi ya 18 ya ṱhoḓisiso na mveledziso, khathihi na miṅwe miṅwedzi ya rathi ya u lingedza phanḓa ha musi pulatifomo iyi i tshi swika kha vhuimo hayo ha ndingedzo. Backroom Bookings i shumisa modele wa khomishini wo itelwaho u vhea mbuelo thwii zwanḓani zwa vhaṋe vha dzinnḓu vha kha vhupo ha zwikolobulasi; vhaṋe vha dzinnḓu a vha lavhelelwi u badeli phanḓa u itela uri nnḓu dzavho dzi kone u vhewa kha mutevhe wa khunguwedzo.
Bono ḽa Chali ḽa tshifhinga tshilapfu ndi u kunguedzwa zwikolobulasi zwi fhiraho 500 na zwifhaṱo zwa 12,500. Zwazwino, o sedzesa kha thandela ya ndingedzo ya miṅwedzi ya ṱahe ya vunḓu ḽa Gauteng yo sedzaho kha zwifhaṱo zwa 150 zwi re ngei Soweto, Thembisa na Mamelodi.
U bvelela ha Chali zwi kalwa nga matshilo ane a vha murahu ha ndaka dzoṱhe dzo ṅwaliswaho. O humbula nga ha musi muṋe wa nnḓu ngei Mamelodi a tshi wana masheleni a swikaho R4 000 u ya kha R5 000 nga ṅwedzi u bva kha lufhera lu sa shumiswi henefho nḓuni yawe u itela u thusa u badela mbadelo dza tshikolo, kana muṋe wa nnḓu ya Soweto a tshi khou aluwa u bva kha yuniti nthihi u ya kha phothifoḽio.
“U ya wa hira kha vhupo ha zwikolobulasi a zwi tou vha iṅwe nḓila ya u wana luafhulelo kha mitengo ya u hira kha vhupo ha nyingaḓorobo, fhedzi ndi khethekanyo yashu ya nṱhesa yo fhaṱwaho ho sedzeswa zwa u ṱanganedza vhaeni, ubuntu, na u kona u swikela maitele a uri ‘local is lekker,’’ u amba ngauralo.
Chali u ṱoḓa uri fhethu huṅwe na huṅwe hu kone u ṋetshedza vhukimvi vhune ha wanala dzihodelani ngeno hu tshi khou vhulunga vhuvha haho ha u vha vhupo ha tshikolobulasi. Khunguwedzo iṅwe na iṅwe i ḓo ṱolwa hu tshi itelwa uri i vhe ya maimo a nṱha phanḓa ha musi u tshi wanala uri i nga hirwa.
Chali u khou amba na zwiimiswa zwa u ṋetshedza masheleni u itela u tikedza khunguwedzo na masheleni a u thoma bindu. U khou dovha hafhu a vha na fulufhelo ḽa u dzhenisa vhaḓivhi vha zwa u nakisa nga ngomu vha bvaho kha zwitshavha zwenezwo u itela u thusa vhaṋe vha nnḓu u khwinisa fhethu havho.
Puḽatifomo iyi i khou shuma kha www.backroombookings.co.za, hune vhaṋe vha ndaka vha nga ḓiṅwalisa khathihi na u kona u swikela dashibodo ya vhaṱanganedzi.
Chali o amba uri u khou pulana u alusa bindu nga zwiṱuku nga u kunguwedza fhethu ha maimo a nṱha.
Nga hetshi tshifhinga, a hu na vhudzulo ho kunguwedzwaho kha pulatifomo nahone a hu na phera dzine dza nga hirwa. Zwazwino Chali u khou ṱuṱuwedza vhaṋe vha ndaka dza vhupo ha zwikolobulasi zwa ngei Soweto, Thembisa na Mamelodi uri vha ṅwalise phera dzavho, phera dza nga murahu, khothedzhi na vhudzulo ha vhaeni sa tshipiḓa tsha u linga tsha vunḓu ḽa Gauteng. U khou humbula u bveledza nethiweke ya mutevhe wa maimo a nṱha phanḓa ha musi a tshi ṱanganedza vhaeni kha puḽatifomo.
U itela u wana zwidodombedzwa zwinzhi nga ha Backroom Bookings, kha vha dalele: www.backroombookings.co.za