Tshimedzi 2026 Khandiso ya 1

Fulufhelo ḽi khou engedzea fhaḽa Muvhunduni wa Maphosa

Vho Lesego Ranchu

Kha vhunzhi Vho Johanna Mailula Mphosa vho thoma Maphosa Drop-in Centre u itela u tikedza vhana na miṱa i songo tsireledzeaho kha vhupo ha havho.ha vhana vha Muvhundu wa Maphosa une wa wanala kha vunḓu ḽa Limpopo, zwifhinga zwa musi tshikolo tsho bva zwo vha zwi tshi amba u fhedza tshifhinga zwiṱaraṱani vha si na muthu ane a vha ṱhogomela ngeno vhabebi na vhaṱhogomeli vhavho vha tshi khou lingedza u wana nḓila dza u ḓitshidza.

Ṋamusi, vhana avho vha na fhethu ho tsireledzeaho hune vha nga ya hone, zwiḽiwa zwi re na pfushi zwine vha nga ḽa na vhaaluwa vhane vha dzhiela nṱha vhumatshelo havho.

Tshanduko iyi yo thomiwa nge ha vha na muṅwe mufumakadzi we a vha o ḓiimisela u shandukisa zwithu. 

Vho Johanna Mailula Maphosa vho thoma fhethu ha vhana hune ha ḓivhiwa sa Maphosa Drop-in Centre nga ṅwaha wa 2016 nga murahu ha musi vho dzhiela nzhele tshivhalo tshine tsha khou engedzea tsha vhana vha songo tsireledzeaho kha tshitshavha tsha havho vhane vha shaya vhulavhelesi na thikhedzo musi tshikolo tshi tshi bva.

 “Mbilahelo yanga khulwanesa yo vha ya u vhona vhana vha tshi khou tamba zwiṱaraṱani musi tshikolo tsho bva hu si na muthu ane a khou vha ṱhogomela. Ndo zwi ḓivha uri ndi tea u ita zwiṅwe zwithu u itela u vha na fhethu ho tsireledzeaho hune vhana vha nga ṱhogomelwa hone khathihi na u vha tikedza,” vho ralo.

Musi shango ḽa Afrika Tshipembe ḽi tshi khou pembelela Ṅwedzi wa Mveledziso ya Matshilisano nga ṅwedzi wa Tshimedzi, Maphosa Drop-in Centre yo sumbedzisa ndeme ya maga o ḓisendekaho kha tshitshavha ane a vha a u tikedza vhana vha re khomboni khathihi na miṱa yo livhanaho na vhushai, u shayea ha mishumo na u sa kona u wana zwiḽiwa.

Zwe zwa thoma sa thandela ṱhukhu ya tshitshavha zwo aluwa zwa vha thuso khulwane kha vhana vha swikaho 68 vhe vha vha vha songo tsireledzea. Senthara iyi i ṋetshedza thuso kha zwa tshuṅwahaya dza vhagudi, thikhedzo ya muhumbulo, vhugudisi ha zwikili zwa vhutshilo na zwiḽiwa zwi re na pfushi zwa ḓuvha na ḓuvha.

Vho Maphosa vho amba uri miṱa minzhi kha vhupo honoho i ḓitika nga magavhelo a zwa matshilisano nahone vha khou kundelwa u ṱhogomela miṱa yavho nga nḓila yo teaho.

"A thi khou pfha ndo fushea nga nyimele dzine dza vha hone kha tshitshavha tshashu. Vhafumakadzi vhanzhi a vha shumi. Khaedu idzi dzi kwama nḓila ine vhana vha aluswa ngayo khathihi na zwikhala zwine vha tea u vha nazwo musi vha tshi khou aluwa,” vha ṱalutshedza ngauralo.

Miṅwahani ya u thoma, u ita uri senthara iyi i dzule i tshi khou shuma zwavhuḓi, zwo vha zwi khaedu khulwane vhukuma. Nga eneo masheleni maṱukuṱuku e a vha e hone, Vho Maphosa vho vha vha tshi ḓitika nga ndambedzo i bvaho kha miraḓo ya tshitshavha vhe vha vha vha tshi kovhelana zwenezwo zwe vha vha vha tshi nga kona.

Naho ho vha na khaedu dzenedzi, tshiimiswa itshi tsho kona u bvela phanḓa na u aluwa he tsha ḓidzhenisa kha zwa vhulimi sa nḓila ya u sika mishumo na u khwinisa vhubveledzi ha zwiḽiwa.

Ṋamusi, thandela iyi ya zwa vhulimi i ṋetshedza mishumo ya tshoṱhe ya 17 khathihi na u bveledza miroho ine ya rengiswa u mona na vunḓu ḽa Limpopo.

Thikhedzo ya NDA i thusa kha u bveledza miloro 

Ho vha na ṱhuṱhuwedzo khulwane vhukuma ye ya ḓa nga kha thikhedzo yo itwa nga vha Zhendedzi ḽa Mveledziso ya Lushaka (NDA), ḽe ḽa ita uri hu vhe na vhushaka ha tshumisano na vha kereke ya The Church of Jesus Christ of Latter-day Saints nga ṅwaha wa 2026. Vhushaka uvhu ha tshumisano ho kona u wana masheleni a swikaho R1.3 miḽioni ane a ḓo shumiswa kha Green Harvest Project, ine ya ḓo thusa kha u khwaṱhisa sisṱeme dza u sheledza, u khwinisa themamveledziso, u ṋetshedza vhugudisi na u engedza mveledziso ya zwiḽiwa hu tshi itelwa Maphosa Drop-in Centre.

Thikhedzo iyi yo dovha hafhu ya sika zwikhala zwa mishumo ya tshifhinganyana khathihi na u thusa kha u bveledza vhumatshelo ha tshifhinga tshilapfhu hu tshi itelwa tshitshavha.

U bva kha zwa u tsireledza vhana musi tshikolo tshi tshi bva u ya kha u sika mishumo na u khwinisa mveledziso ya zwiḽiwa, Maphosa Drop-in Centre zwazwino yo no vha tshedza tsha fulufhelo kha Muvhundu wa Maphosa.

Vho Lesego Ranchu ndi Muofisiri wa zwa Vhudavhidzani kha tshiimiswa tsha NDA. 

 

U itela u wana zwidodombedzwa zwinzhi nga ha NDA, kha vha dalele: www.nda.org.za
General
Share this page