Vhakhethi vho
ḓiṅwalisaho vhane vha sa ḓo kona u voutha zwiṱitshini zwavho zwa u vouthela nga ḓuvha ḽa khetho zwazwino vha nga kona u ita khumbelo ya vouthu yo khetheaho kha Khetho dza Muvhuso Wapo dza ṅwaha wa 2026.
Khumbelo dzo vula nga ḽa 21 Khubvumedzi nahone dzi ḓo vala nga awara ya 17:00 nga Musumbuluwo, wa ḽa 12 Tshimedzi 2026.
Khetho dzi ḓo farwa nga ḽa 4 Lara, ḓuvha ḽe Phresidennde Vho Ramaphosa vha ḽi ḓivhadza sa holodei ya nnyi na nnyi.
U ya nga webusaithi ya Khomishini ya Khetho (IEC), vouthu dzo khetheaho dzi thusa uri vhathu vhe vha vha vha sa ḓo kona u shela mulenzhe kha khetho vha kone u shumisa pfanelo dzavho dza demokirasi.
Ndi vhonnyi vhane vha tea u ita khumbelo?
Vhaiti vha khumbelo vha tea u vha vhakhethi vho ḓiṅwalisaho nahone vha vhe na ḽiṅwalo ḽa vhuṋe ḽo teaho ḽa Afrika Tshipembe.
Maṅwalo ane na one a ṱanganedzwa ndi ane a katela bugundaula ya muvhala mudala ine ya vha na bakhoudu, garaṱandaula ya smart, kana Ṱhanziela ya Vhuṋe ya Tshifhinganyana yo teaho.
Hu na zwigwada zwivhili zwa vouthu dzo khetheaho.
Tshigwada tsha u thoma ndi tsha vhakhethi vhane vha nga kona u ya zwiṱitshini zwavho zwa vhukhethelo fhedzi vha sa kone u voutha nga ḓuvha ḽa khetho. Hezwi zwi nga katela vhathu vhane vha ḓo vha vhe nnḓa ha zwiṱiriki zwavho zwa u vouthela nga ḽa 4 Lara, u fana na vhashumi vha tshumelo dza ndeme khathihi na miraḓo ya nyanḓadzamafhungo.
Vhaiti vha khumbelo vhane khumbelo dzavho dzo ṱanganedzwa vha ḓo kona u voutha kha zwiṱitshi zwavho zwa u vouthela zwo redzhisiṱariwaho nga ḽa 2 na ḽa 3 Lara, phanḓa ha ḓuvha ḽa khetho ḽa 4 Lara.
Tshigwada tsha vhuvhili ndi tshine tsha tendela madalo a mahayani kha vhakhethi vhane vha sa kone u ya tshiṱitshini tsha u vouthela ngauri a vha na mutakalo wavhuḓi muvhilini, vha na vhuholefhali, kana vho vhifha muvhilini.
Vhaofisiri vha ḓo dalela vhaiti vha khumbelo vho tendelwaho kha aḓiresi dzavho dze vha dzi ṋetshedza musi vha tshi khou ita khumbelo. Aḓiresi idzo dzi tea u vha henefho nga ngomu ha tshiṱiriki tshe uyo muiti wa khumbelo a ḓṅwalisa khatsho.
Nḓila dza u ita khumbelo
Vhakhethi vha nga ita khumbelo nga kha tshiimiswa tsha khumbelo dza inthanethe tsho tsireledzeaho tsha IEC kha www.elections.org.za.
Avho vhane vha ita khumbelo ya u voutha tshiṱitshini tsha u vouthela vha nga dovha vha rumela nomboro yavho ya vhuṋe nga SMS kha nomboro ya 32249. Tshumelo iyi i badelwa R1 nga SMS. Hezwi zwi nga si kone u shumiswa musi hu tshi khou itwa khumbelo dza u tou dalelwa mahayani.
Vhaiti vha khumbelo vha nga dovha hafhu vha ḓadza fomo ya Khumbelo ya Vouthu yo Khetheaho vha i ṋetshedza nga tshanḓa kha ofisini yapo ya IEC ya havho. Fomo a dzi tei u rumelwa nga imeiḽi kana nga fekisi. Muṅwe muthu na ene a nga kona u ṋetshedza idzo fomo dzo ḓadzwaho a tshi itela mukhethi.
Muraḓo wa muṱa kana khonani na ene a nga kona u ṋetshedza khumbelo ya u dalelwa hayani henefho ofisini yapo ya IEC yo teaho.
Vhaiti vha khumbelo vha ḓo wana SMS ya u vha ḓivhadza nga ha mvelelo nga murahu ha musi khumbelo dzavho dzo no lavheleswa. Vha nga kona u dovha hafhu vha vhona tshiimo tsha khumbelo yavho kha inthanethe.
Vhakhethi vha nga khwaṱhisedza tshiimo tshavho tsha u ḓiṅwalisa khathihi na tshiṱitshi tshavho tsha vhukhethelo kha webusaithi ya IEC, nga u rumela SMS i re na nomboro yavho ya vhuṋe kha 32810, kana nga u tou founela kha 0800 11 8000.
Vhaiti vha khumbelo vhane khumbelo dzavho dzo ṱanganedzwa vha tea u voutha kha tshiṱitshi tsha vhukhethelo tshe vha ḓiṅwalisa khatsho nga nnḓa ha musi vho tendelwa uri vha ḓo dalelwa mahayani avho.