Musi ramabindu
ane a vha Gqeberha Zama Gege a tshi thoma u tanganisa mapfura a mupo e hayani hawe nga ṅwaha wa 2022, o vha a tshi khou tou ṱoḓa tshithu tshine tsha nga mu thusa kha thaidzo ya lukanda lwawe lune lwa tata vhukuma, dendirafu na u sekena ha mavhudzi.
Vhunzhi ha zwibveledzwa zwe Gege a zwi lingedza zwo vha zwi tshi ita uri lukanda lu vhaisale, zwa ita uri a ṱoḓe zwiṅwe zwithu zwine zwa vha na vhulenda.
“Ndo vha ndi tshi khou tou ṱoḓa tshiṅwe tshithu tshine tsha nga sa ḓo sinyusa lukanda lwanga,” o amba ngauralo.
Ṱhoḓisisi dzawe dzo mu livhisa kha khemisi ine ya rengisa thimbwanywa dza mupo he nyambedzano yawe na dokotela wa lukanda yo mu livhisa kha nḓila ine a nga ṱanganya ngayo mapfhura a ndeme nga nḓila yo tsireledzeaho. Nga murahu ha maḓuvha a si gathi a u shumisa muvango wawe, lukanda lwa Gege lwa muvhilini na lwa ṱhoho lwo swika he lwa khwinisea.
O thoma u ṱanganyisa zwibveledzwa zwa vhathu vha si gathi he nga murahu a kona u zwi vhona uri thandululo yawe ye a kona u i bveledza nga ene muṋe i nga swika hune ya vha bindu nga yone iṋe.
O dovha a kona u khunyeledza khoso yawe ya zwa vhubveledzi ha mishonga kha University ya Nelson Mandela he a mbo ḓi thoma u bveledza mishonga ya u kulumaga, seramu na zwiṅwe zwibveledzwa zwa u ṱhogomela lukanda na mavhudzi nga fhasi ha dzinakhwevho ḽawe ḽi ḓivhiwaho sa I Plus ZG.
Musi a tshi khou bveledzisa zwibveledzwa izwi, Gege o vha a tshi renga zwishumiswa zwa u bveledza nga vhunzhi u bva kha vhaṋetshedzi vhapo u itela u fhungudza mbadelo ngeno a tshi khou ita vhuṱanzi ha uri zwibveledzwa zwawe zwi vhe zwa ndeme khulwane.
Thikhedzo i bvaho kha vha Zhendedzi ḽa Masheleni a Thikhedzo ya Mveledziso ya Mabindu Maṱuku (SEDFA) yo thusa bindu iḽi ḽine ḽa kha ḓi vha ḽiswa uri ḽi bve kha u sokou vha muhumbulo u ya kha u vha bindu ḽine ḽa khou aluwa. SEDFA yo thusa nga webusaithi, ngeletshedzo ya zwa mabindu na thuso ya masheleni a u linga zwibveledzwa.
Gege o amba uri zhendedzi ḽo ṋetshedza masheleni a swikaho R15 000 a u bveledza webusaithi khathihi na maṅwe a swikaho R56 000 a u ita ndingo na vha Yunivesithi ya Limpopo.
"SEDFA yo nthusa vhukuma. Ndi yone ye ya ita uri bindu iḽi ḽanga ḽi vhe hone."
O humbula nga ha musi a tshi dzhenela muṱaṱisano wa zwa mabindu he a vhudzwa uri a nga si vhuye a u wina ngauri zwibveledzwa zwawe a zwi athu tendelwa. Musi mvelelo dzi tshi vhuya, dzo mu ṋea fulufhelo ḽa u zwi kunguwedza na u zwi rengisa.
Bindu ḽawe zwazwino ḽi na mushumi muthihi wa tshoṱhe nahone ḽi shuma na vhaḓinḓa vha dzinakhwevho tshifhinganyana. Gege o dovha hafhu a ḓivhadza modele wa u rengisa hafhu, a tshi tikedza vhafumakadzi vha rathi vhane vha renga na u rengisa zwibveledzwa zwawe.
Zwibveledzwa zwa I Plus ZG zwi kha ḓi tou bva u kunguwedzwa kha Amazon, ḽiga ḽihulwane vhukuma ḽine Gege a ḽi ṱalutshedza sa ḽiga ḽi takadzaho nahone ḽi konḓaho nga mulandu wa ṱhoḓea dza pulatifomo yeneyo.
Kha Gege, mushumo uyu ndi muhulwane vhukuma u fhira u sokou rengisa mishonga ya ndondolalukanda: ndi u alusa dzinakhwevho ḽawe ngeno a tshi khou ṱuṱuwedza vhaṅwe uri na vhone vha tevhele zwa vhubindudzi.
"A hu nga ḓo tou vha na tshifhinga tshonetshone tsha u thoma bindu. Thomani nga zwine na vha nazwo, hune na vha hone ṋamusi," Gege o fhedzisa ngauralo.