Matshudeni vhane vha khou ṱoḓa thuso ya masheleni u bva kha Tshikimu tsha Thuso ya zwa Masheleni a Matshudeni tsha Lushaka (NSFAS) kha ṅwaha wa pfunzo wa 2027 vha tea u rumela khumbelo dzavho hu sa athu swika ḓuvha ḽa 31 Tshimedzi 2026.
Mudzulatshidulo wa bodo ya NSFAS Vho Richardt Tlou Ramashia vha khou ṱuṱuwedza vhaiti vha khumbelo uri vha ite khumbelo dzavho hu tshe na tshifhinga, vha rumele maṅwalo o teaho nahone vha dzhiele nzhele zwa uri ḓuvha ḽa u fhedzisela u rumela khumbelo a ḽi nga ḓo engedzwa.
Musi vha tshi khou amba nga tshifhinga tsha u vulwa ha tshifhinga tsha u ita khumbelo dza ṅwaha wa 2027 ngei Johannesburg, Vho Ramashia vho amba uri tshifhinga itsho tsho tiwaho tsho tou vhewa tsho tou ralo nga khole u itela u ṋea NSFAS tshifhinga tsho eḓanaho tsha u sedzulusa khumbelo, u oditha tsheo dzayo na u tandulula tsheo dza khaṱhululo phanḓa ha musi ṅwaha wa pfunzo u tshi thoma.
"Sisṱeme ya u ita khumbelo yo vula nahone i ḓo vala nga ḽa 31 Tshimedzi ṋaṅwaha. Nga ḽa 30 Lara, ri khou lavhelela uri ri ḓo vha ro no khunyeledza tsheo dzashu dza nga ha u avhelwa ha masheleni. Izwi zwi ḓo ḓisendeka kha maitele a u tea ha vhaiti vha khumbelo," vha ralo.
U bva nga ḽa 1 u swika nga ḽa 9 Nyendavhusiku, NSFAS i ḓo oditha tsheo dzayo dza u ṋetshedza masheleni u itela u vhona uri ndi matshudeni vho teaho fhedzi vhane vha khou tendelwa u wana masheleni ayo na uri a hu na muhumbeli o teaho ane a khou hanelwa thuso nga mulandu wa vhukhakhi ha zwa ndangulo.
Matshudeni vhane vha sa tendelane na tsheo dzavho dza nga ha u ṋetshedzwa ha masheleni vha ḓo tendelwa u rumela khumbelo dzavho dza khaṱhululo vhukati ha ḽa 10 na ḽa 24 Nyendavhusiku. NSFAS i khou pulana u anḓadza mvelelo dza khumbelo dza khaṱhululo dzoṱhe hu sa athu swika ḽa 9 Phando 2027 khathihi na u ṋetshedza zwiimiswa zwa pfhudzo mutevhe wa matshudeni vho ṋetshedzwaho masheleni hu sa athu swika ḽa 11 Phando.
Vho Ramashia vho amba uri tshikimu tsho ḓiimisela u ṱanganedza, u sengulusa na u dzhia tsheo dza nga ha khumbelo dzine dza khou lavhelelwaho u swika kha luṱa lwonolwu lwa khumbelo.
Vho Ramashia vho amba uri NSFAS yo ita vhuṱoli ho fhelelaho u itela u thivhela uri thaidzo dza zwa thekhiniki dzi si hanele vhahumbeli vha thuso ya zwa masheleni zwi songo tea.
Itani khumbelo ni tshi shumisa luṱingothendeleki lwaṋu
Ḽiṅwe fhungo ḽihulwane kha ulwu luṱa luswa lwa u ita khumbelo ndi pulatifomo yo khwinifhadzwaho ya NSFAS ya u ita khumbelo nga luṱingothendeleki. I tendela matshudeni vha tshi vula phurofaele yavho, vha ita khumbelo ya thuso ya zwa masheleni, vha apuḽouda maṅwalo a thikhedzo na u wana khwaṱhisedzo kha zwishumiswa zwavho zwa ṱhingothendeleki.
Vhaiti vha khumbelo vha tea u vhona uri maṅwalo oṱhe a thikhedzo o fhelela nahone a a vhalea. Vho Ramashia vho tsivhudza vhaiti vha khumbelo uri maṅwalo a songo fhelelaho kana a sa vhalei a kha ḓi vha zwiṅwe zwa zwiitisi zwihulwane zwa tshilengo tsha u senguluswa ha khumbelo dzavho.
Fomo ya thendelo yo ḓadzwaho na u sainwa i tea u dovha hafhu ya ṋetshedzwa u itela u tendela NSFAS uri i khwaṱhisedze mafhungo a zwa masheleni a vhabebi kana vhaṱhogomeli vha muhumbeli. U kundelwa u ṋetshedza fomo iyo zwi nga ita uri khumbelo i thudzelwe thungo.
Vhaiti vha khumbelo vha tea u puṱedza batheni ya u fhedzisela ya “u rumela” nahone vha khwaṱhisedza zwa uri vho wana nomborondaula i sa fani na ya muṅwe, ine ya ḓo shumiswa kha u sedza tshiimo tsha khumbelo yavho.
Mafhungo aya o ṋetshedzwa nga vha ha NSFAS.