Tshimedzi 2026 Khandiso ya 1

Khoro ntswa i khwaṱhisa nndwa ya u lwa na zwiito zwa GBVF

Vho Jeanette Ndamane

Khoro ya Lushaka ya nga ha Khakhathi dzo Ḓitikaho nga Mbeu na Mabulayo a Vhafumakadzi (NCGBVF) ine ya kha ḓi tou bva u vhumbiwa yo livhiswa kha u khwaṱhisa maga a shango ḽa Afrika Tshipembe a u lwa na khakhathi dzo ḓitikaho nga mbeu khathihi na u khwinisa tswikelo ya tshumelo dza thikhedzo kha avho vho ponyaho. Khoro iyi ye ya vhumbwa nga fhasi ha Mulayo wa Khoro ya Lushaka ya nga ha Khakhathi dzo Ḓitikaho nga Mbeu na Mabulayo a Vhafumakadzi wa ṅwaha wa 2024, i ṱanganya muvhuso, tshitshavha tsha vhadzulapo na sekithara ya phuraivethe hu tshi itelwa u bveledza zwipikwa zwa Pulane ya Lushaka ya Ndeme ya nga ha zwiito zwa GBVF.

Khoro ya hone ye ya tholwa nga ḽa 1 Ṱhangule 2026, i khou lavhelela u khwinisa tshumisano vhukati ha tshumelo nnzhi dzine dza shela mulenzhe kha maga a u lwa na zwiito zwa GBVF.

 “Mushumo wa khoro iyi ndi u vhona uri hu khou vha na maga o teaho a u lwa na zwiito zwa GBV, na uri zwenezwi zwiito zwa GBV khathihi na mabulayo a vhafumakadzi zwi khou thivhelwa khathihi na u fheliswa,” hu amba Mudzulatshidulo wa Khoro Dokotela Vho Lebogang Mathibe Ramalepe.

Vho ombedzela uri Khoro iyi a i khou ima vhuimoni ha vhaofisiri vha mapholisa, vhashumi vha zwa mutakalo, vhashumelavhapo kana khothe, fhedzi i shuma i tshi itela u vhona uri tshumelo idzi dzi khou shumisana nga nḓila yavhuḓi nahone dzi khou dzula dzi na vhuḓifhinduleli.

Iṅwe ya tshumelo dza ndeme dzine Khoro ya ṱoḓa zwitshavha zwi tshi dzi shumisa nga maanḓa ndi nethiweke ya Senthara dza Ndondolo dza Thuthuzela. Senthara idzi dzi ṋetshedza thikhedzo ya dzilafho na ya muhumbulo, thuso ya mapholisa khathihi na thuso ya maitele a zwa mulayo na khothe henefho fhethu huthihi.

"Ro vhea zwiimiswa izwi fhethu huthihi. Heyi ndi yone nḓila ine ra khou ḓo thivhela ngayo uri vhapondwa vha sa sokou iswa ngei na ngei na u dzulela u vha humbudza nga ha vhuṱungu ha zwe vha ṱangana nazwo."

Dokotela Vho Ramalepe vho amba uri hu nga ṋetshedzwa ndaela dza tsireledzo henefho kha Senthara dza Ndondolo dza Thuthuzela nga ḓuvha ḽithihi. Vhaponyi vhane vha sa kone u vhuyelela mahayani avho nga nḓila yo tsireledzeaho vha nga dovha vha rumelwa fhethu ha vhukhudo musi maitele ayo a tshi khou bvela phanḓa.

Zwazwino hu na Senthara dza Ndondolo dza Thuthuzela dza 68 u mona na shango ḽoṱhe, fhedzi hu kha ḓi ṱoḓea uri hu vhe na dziṅwe nnzhi, nga maanḓa vhuponi ha mahayani. Khoro i khou pulana u lavhelesa kha dziṅwe nḓila dza u engedza modele u ya kha kiḽiniki dza tshitshavha dzo teaho dzine dza shuma awara dza 24.

"U fhola kha zwiito zwa GBV ndi lwendo lulapfhu. Thikhedzo a i swiki hune ya fhela musi muponyi a tshi vhiga tshiwo itsho. Vhaponyi vha nga ṱoḓa thuso i bvelaho phanḓa zwenezwo musi vha tshi khou fhola, u kona u swikela thikhedzo na u ṱoḓa vhulamukanyi," vho amba ngauralo.

Naho Khoro i tshi kha ḓi vha kha vhuimo ha u thoma ha mushumo wayo, Dokotela Vho Ramalepe vho amba uri zwa u thivhela zwi kha ḓi vha tshipikwa tshavho tshihulwane. Uri ri kone u vhona uri i khou shuma zwavhuḓi, hu tea u vha na u fhungudzea ha tshivhalo tsha vhafumakadzi, vhana na vhathu vha re na vhuholefhali vhane vha khou ṱangana na zwiito zwa dzikhakhathi, ngeno vhaponyi vha tshi khou wana thikhedzo i ṱhonifheaho nahone ine ya khou tshimbidzwa zwavhuḓi.

Vho ombedzela uri zwa u thivhela zwiito zwa GBVF a si vhuḓifhinduleli ha muvhuso fhedzi. Miṱa, vhahura, vharangaphanḓa vha sialala, madzangano a vhurereli na miraḓo ya tshitshavha vhoṱhe vha na mushumo une vha tea u ita nga u hana zwa u ita uri khakhathi dzi vhe zwiito zwo ḓoweleaho, u tikedza vhaponyi na u vha thusa uri vha kone u swikela tshumelo.

Khoro i khou dovha hafhu ya pulana u khwaṱhisa maitele a u vhiga mbilaelo u itela uri miraḓo ya tshitshavha vha kone u vhiga zwa u kundelwa ha tshumelo khathihi na u thusa u khwinisa vhuḓifhinduleli. 

 

Ndi ngafhi hune vha nga wana hone thuso:
Arali vhone kana muṅwe muthu ane vha mu ḓivha a tshi khou ṱangana na zwiito zwa GBV, thuso i hone. Kha nyimele ya shishi, kha vha founele SAPS kha 10111, vha tshumelo dza shishi kha 112 kana vha dalele Senthara dza Ndondolo dza Thuthuzela dzi re tsini navho. Vha nga dovha hafhu vha kwamana na vha Senthara ya Ndangulo ya Khakhathi dzo Ḓitikaho nga Mbeu kha 0800 428 428. Vha nga rumela “Please Call Me” kha *120*7867#, vha rumele ipfhi “help” kha 31531, kana vha shumise vhukwamani ha Skype “Helpme GBV” kha miraḓo ya tshitshavha tsha Madzinganḓevhe.
General
Share this page