Thietha ya
Muvhuso ya Afrika Tshipembe (SAST) i khou ramba makumedzwa a nga ha mutevhe wa Mbekanyamushumo Khulwane dzayo dza ṅwaha wa 2027 u swika 2030. Vhabveledzi nga muthihi nga muthihi na khamphani dza vhutsila vha khou ṱuṱuwedzwa u ṋetshedza khumbelo dzavho phanḓa ha ḓuvha ḽa 16 Tshimedzi 2026 nga awara ya vhuṱanu nga masiari.
SAST i khou lavhelela u wana mushumo wa thero dzo teaho dzine dza ḓo kona u swikela ndavhelelo dza vhathetshelesi vha Afrika Tshipembe vha musalauno ngeno dzi tshi khou thusa u bveledza maitele maswa a thietha fhano kha ḽa Afrika Tshipembe.
“Ri khou ṱoḓa mushumo wo teaho, u takadzaho, u ṱuṱuwedzaho, wo khwaṱhaho nahone na u nyanyulaho, hu tshi katelwa na mishumo ine ya ḓo ṱuṱuwedza khanedzano khathihi na u pfala kha vhadzulapo zwavho vha ḽa Afrika Tshipembe. Zwa ndeme, ri khou ṱoḓa mushumo une wa vha na khonadzeo ya u kunga vhathetshelesi,” SAST yo amba ngauralo kha tshitatamennde tshayo.
Vhubveledzi vhune ha ḓo tshimbila zwavhuḓi vhu ḓo wana masheleni na mbadelo ya u bveledza nahone vhu ḓo sumbedzwa kha thietha dzo fhambanaho dza SAST. Nga nnḓa ha mbadelo dza zwa vhubveledzi, Thietha ya Muvhuso ya Afrika Tshipembe i ḓo ṋetshedza thikhedzo ya khunguwedzo na vhushaka ha tshitshavha.
Tshaka dza mveledziso dzo vuleaho kha mbekanyamushumo dzi katela thietha ya vhana, ḓirama, tseisi, thietha ya muzika na dziṅwe tshaka dza vhubveledzi.
Vhaiti vha khumbelo vha tea u ṋetshedza luṅwalo lwa u ṱanganedza lwa masiaṱari mavhili lune lwa tikedza nḓila ine mveledziso yavho ya vha yo teaho ngayo, u takadzaho hayo, u vha hayo ya maimo a nṱha na u ṱuṱuwedza hayo.
Vha tea u dovha hafhu vha rumela:
- Manweledzo mapfufhi a mveledziso, ṱhalutshedzo ya siaṱari ḽithihi kana mavhili, kana ṱhalutshedzo ya tshiṱori yo leluwaho ya ngaha thandela yeneyo.
- Ḽiṅwalwa ḽa nzivhanyedziselo.
- Zwidodombedzwa zwa khamphani, hu tshi katelwa na phurofaela ya mulanguli.
- Mafhungo a vhusiki sa bayogirafi.
- Zwidodombedzwa zwa vhukwamani zwo khwaṱhisedzwaho zwa muhumbeli onoyo.
Vhaiti vha khumbelo vha tea u dovha hafhu vha ṋetshedza zwishumiswa zwa u kunguwedza na u phaḓaladza arali mveledziso iyo yo no sumbedzwa tshifhingani tsho fhelaho. Mveledziso dzi si na ḽiṅwalwa, kana mveledziso dza u tshina na dza mushumo, dzi tea u katela nganetshelo i sa fhiri masiaṱari maṋa.
Vhubveledzi hoṱhe vhu tea u vha na tshifhinga tsha fhasisa tsha mithethe ya 45.
Ḽinki dziṅwe na dziṅwe dzo ṋetshedzwaho dzi tea u dzula dzi tshi swikelea lwa maḓuvha a sa fhiriho 120 u itela uri dzi kone u senguluswa. A hu na ṱhoḓea ya u vha muraḓo, u badela kana u ṅwalisa u itela u kona u swikela maṅwalo kana vidio, nahone hu tea u ṋetshedzwa thendelo dzoṱhe dzo teaho.
Vhaiti vha khumbelo vha khou ṱuṱuwedzwa u nambatedza maṅwalo oṱhe a thikhedzo musi vha tshi rumela makumedzwa avho.
Makumedzwa ayo a ḓo senguluswa nga vhaḓivhi vha thietha vha nnḓa vho tholwaho nga SAST.
Khumbelo dzi tea u rumelwa nga imeiḽi kha mainproposals@statetheatre.co.za nga fhasi ha thero ine ya ri: Mbekanyamushumo Khulwane 2027/30