Faka sicelo sekusitwa ngetimali kuphrojekthi yetemagugu nga-2026/27

Nangabe unephrojekthi yetemagugu longakhona kusita kuwalondvolota, kuwavikela, kanye neku-gcugcutela emasiko emagugu lahlukahlukene aseNingizimu Afrika, Umkhandlu Wavelonkhe Wetemagugu (i-NHC) ucela kutsi ufake Sicelo sakho Sekusitwa Ngetimali nga-2026/27 kuphrojekthi yemagugu lesuselwa emmangweni mhla ti-15 Kholwane 2026.

I-NHC itsite emaphrojekthi kufanele kutsi agcile ekulondvoloteni emagugu ngekusebentisa lucwaningo, kubhala emadokhumenti, kuwenta abe kudijithali, ngemfundvo, kanye nekwendlulisa lwati.

Labafaka ticelo labafanelekile kufaka ekhatsi:

• Tikhungo tetemfundvo
• Tinkampani letingenti inzuzo 
• Tinhlangano letingenti inzuzo 
• Tinhlangano letingekho ngephasi kwahulumende 
• Tinhlangano temmango
• Tinhlangano, tinhlangano letisunguliwe, kanye nemathrasti emmango (ngaphandle kwemathrasti emndeni)
• Imikhandlu Yendzabuko Sisebenti Lesikhulu se-NHC, Dkt. Thabo Manetsi, wagcizelela kubaluleka kwetihlongoto tekusita ngetimali ekuchubeleni embili ligunyakwenta lale-nhlangano.

"Sibopho lesingumnyombo se-NHC kwaba lusito lwetetimali kumaphrojekthi emagugu lahambisana neligunyakwenta letfu kanye nekufaka ligalelo lelivakalako ekulondvoloteni umshiyalifa wemasiko. Letihlongoto tidlala indzima lemcoka ekuciniseni kubumbana ngekwetenhlalo kanye nekwabelana bungiko bebuve,” kwasho yena njalo Manetsi.

Imikhakha Yekusita Ngetimali

Kusitwa ngetimali kutawuphakelwa kulemikhakha lemitstafu lemcoka:

• Ligugu leliphilako: Emaphrojekthi lagcila ekubhaleni imilandvo letekwako, tinhlelo telwati lwendzabuko, kufaka kudiithal kwetemasiko kanye nekulondvolotwa kweligugu leMakhoi neMasan.
• Ligugu lemasiko, lemvelo nekucina kwalo: Tihlongoto letihlwaya ngebuholi betendzabuko, iminyakato lecinile, nalemcoka ngekwemasiko nome tindzawo letihlonishwako.
• Kucecesha nemfundvo: Tinhlelo lokuhloswe ngato kugcugcutela kucaphela temagugu, kwendluliswa kwelwati kanye nemfundvo yemmango kuze kwesekelwe kwakhiwa kwesive.

I-NHC iphindze futsi yanaka kutsi labafake ticelo labasitwa ngetimali kwanyalo ngaphasi kweLuhlelo Lwekukutsata Kucashwa LwaMengameli nome imijikeleto yekusita ngetimali ye-NHC ngeke ifaneleke ngaphandle kwekutsi bangenise yonkhe imibiko lesilele nome bacedzele tinkhombakwentiwa lokuvunyelanwe ngato.

Manetsi ugcugcutele kuphangisa kwekwentiwa kwemalungiselelo ekungenisa ticelo: “Sigcugcutela labafake ticelo kutsi bacale lenchubo ngekushesha nakwenteka kuze kucinisekiswe kutsi tonkhe tincabekelwane kuhlangabetanwa nato. Licembu letfu lihlala njalo likhona kuze linikete inkhombandlela nekwesekela kuyo yonkhe lenchubo yekufaka sicelo,” kwasho yena njalo. 

Tonkhe ticelo letingeniswako kufanele kutsi tentiwe ku-inthanethi ngekusebentisa iPraxis Grant Management System ye-NHC, lokufinyelelwa kuyo ngekuvakashela ku: https://nhc.praxisgms.co.za/ nome kuWebhusayithi ye-NHC.

Kute ticelo letitfunyelwe ngencwadzigezi nome letiletfwe ngesandla letitawunakwa.

Kuze utfole lwatiso lolubanti lolumayelana netincabekelwane tekufaka sicelo kanye netilinganisosimo, vakashela ku: www.nhc.org.za  

Nome tfumela incwadzigezi ku:  funding@nhc.org.za nawunemibuto yelusito lwetimali lwaka-NHC.