Inkampani leseSoweto yetebucwepheshe yetfula umkhicito lomusha lotawugucula kusebenta kulemboni

Seati Moloi waseSoweto, eJozi ungumsunguli weluhlelokusebenta (isofthiwe yangcondvomshini) lwangcondvomshini lotsikameta imboni yetebucwepheshe ngekutsi kugcugcutelwe umkhankhaso wekubeka embili tisetjentiswa nemikhicito yaseNingizimu Afrika emakethe yemhlaba wonkhe.

Njengengcweti yebusayensi bangcondvomshini, bekayincenye yelicembu lasenta ngakhona, lwekuvuna labo bebabandlululwa labebancishwa ematfuba phambilini ngenca yekutsi lomsebenti wakhe webungcweti bewubuswa kakhulu bantfu labamhlophe ngaphasi kwahulumende welubandlululo.

Ngemuva kwekucitsa iminyaka yekucala yekusebenta kwakhe kulesinye setikhungo tekubhanga saseNingizimu Afrika njengemsunguli weluhlelokusebenta lwangcondvomshini — ngekugcila ngalokukhetsekile ekusunguleni nasekugcineni kusebenta kwemishini yemathela (ema-teller) latetentekelako wasebenta ngembikwekutsi acale kungena kutemabhizinisi — nyalo ungumsunguli neSisebenti Lesikhulu seKhoi Tech.

Lenkampani leseSoweto igcile ngalokukhetsekile ekudizayineni nasekwakheni tisetjentiswa tebucwepheshe letifakwako letenta kancono kucaphela imphilo kanye nekulawula kusebenta, lokufaka ekhatsi emawashi ekucaphela esimanje kanye netisetjentiswa letincane tekulalela letifakwa etindlebeni letite tintsambo (ema-iyefoni).

“Tisombululo tetfu tetebhizinisi tifaka ekhatsi tisombululo temphilo lenhle yebasebenti emkhakheni wetemphilo wetekusebenta kuto tonkhe timboni, tisombululo tekulawula khashane emkhatsini wadokotela nesigulane kuhulumende nasemikhakheni letimele lenakekela ngekwemphilo, kudzinwa netisombululo temphilo lenhle tetigitjelwa tetimboni nekuhlatiya emadatha emacembu emidlalo kanye nekusebenta kwetimondzawo,’’ kwachaza yena njalo.

Letisombululo tiniketa emadatha langentiwe etingenelelo letentiwa ngembi kwesehlakalo futsi tingadlala indzima lemcoka etimeni tekusindzisa ikakhulu kutekunakekela ngetemphilo, tekutfutsa, tetimayini kanye nalapho kuhlala khona bantfu lasebakhulile.

Wacala kuchuba ibhizinisi ngesikhatsi selubhubhane lwe-COVID-19 ngemuva kwekusebentisa bongcondvomshini labanengi kanye nemabhizinisi laphatselene nebucwepheshe anebangani bakhe. 

Wasungula i-Khoi Afriwatch1, liwashi lekucaphela lesimanje lelikunika idatha yetemphilo ngekushesha nekutsi lebhizinisi yatfola sibonelelomali se-R500 000 seluhlelo lwakaTelkom Futue Makers nga-2022. Loku kwasita lenkampani kutsi ikhokhele tindleko tekwakha, kanye nekutsi leliwashi lesimanje lizuze kunemba lokumangalisako longe-94% kwetilinganiso temethriksi temphilo.

Kulandzelela tigulane letinesifo samdlavuta wemaphaphu

Lenkampani iphindze futsi yahlangana nesibhedlela iChris Hani Baragwanath Academic Hospital, lesisebentisa emawashi ekucaphela esimanje ekulandzelela tigulane tamdlavuta wemaphaphu letilinganiselwa kuletinge-30. Moloi ukholelwa ekutseni loku kusita lesibhedlela kutsi sente kancono kuletfwa kwetinsita kuphumela ngaphandle kwetikhungo taso tekunakekela ngetemphilo ngobe kute imibhedze leyanele yekulalisa tigulane.

“Letigulane tiwatfola kitsi lamawashi ekucaphela esimanje, makhalekhikhini kanye nedatha kaTelkom, futsi sesakhe luhlelokusebenta lwangcondvomshini lwagobela lokuvumela sibhedlela kutsi silandzelele tigulane taso khashane, ngekusebentisa Lusito lweNyuvesi yaseWits. Kunemasu ekusebentisa luhlelo lwetigulane leti-150 kanye nekutsi ekugcineni kufinyelelwe etigulaneni letiyi-1000.

“Ngetulu kwekusita ngetimali, i-Telkom iphindze futsi yeluleka ibhizinisi yetfu, yayicecesha, yayenta yafinyelela etimakethe, kutfutfukisa baphakeli, kanye nekuyinika ematfuba ekutsenga sibili. I-Telkom itsenga imikhicito yetfu ngebunyenti futsi ayisabalalise etitolo tayo letingetulu kwaletinge-300 eveni lonkhe, iphindze futsi isisite ngematfuba ekumaketha. 

“Mhla lu-1 Inkhwekhweti, sitawube sivula sitolo sekucala longena kuso matfupha utsenge lapha eCenturion, eGauteng. Lokwenteka ngenca yebaka-Telkom ngekusebentisa budlelwane betfu,” kwachaza yena njalo.

I-Telkom ingaphasi kwembuso ngalokuyincenye, iyinkampani leseluhlwini ngekwemmango kunekutsi ibe yibhizinisi lengephasi kwembuso ngekwendzabuko. Hulumende waseNingizimu Afrika unelutjalomali lolunge-40.5%, neLitiko Letekuchumana Nebucwe-pheshe Bedijithali lelimelele bunikati bemashezi. Lisebenta njengesikhungo setebhizinisi, lesiseluhlwini lweJohannesburg Stock Exchange, lelinelutjalomali lolumcoka lolutimele.

Imikhicito yeKhoi Tech iphindze futsi itfolakale etitolo takaMakro letikhetsiwe eveni lonkhe-kanye naseluchungechungeni lwetitolo eSoweto yonkhe.

Nanome lenkampani inekontileka nemakhi wemphahla wemave emhlaba kuze ikhicite tisetjentiswa tayo, bunikati bekucamba beluphawukuhweba lweKhoi butawuhlala bulapha eveni futsi lobunge-100% beKhoi Tech, kucinisekisa kutsi tingucuko letinsha, kwakha lizingagugu, kanye nekutsi  lizinganani lelengetiwe lenkampani lihlala litinte eNingizimu Afrika.

NgeLweti nga-2024, iKhoi Tech yetfula iKhoi Afripods1 True Wireless Earphones, ngekuhlanganisa kusebenta ngetingucuko letinsha ngebuhle baseNingizimu Afrika.

Icinisekiswe ngalokusemtse­tfweni yi-ICASA

Moloi utsite lemikhicito iphindze futsi yacinisekiswa nglokusemtsetfweni nguMtimba Lotimele Logunyata Tekuchumana waseNingizimu Afrika (i-ICASA) kucinisekisa kutsi iphephile kutsi ingasetjentiswa bantfu. Utimisele kutsi aphonsele incabhayi tinhlobo tebatsengi bete-elekthroniki bemhlaba wonkhe ngekutsi abeke tingucuko letinsha tase-Afrika embili.

“Nanome linengi letimphawu temikhicito yetfu letinato atisitinsha, sincume kutsi setfule lomkhicito wetfu lotawugucula kusebenta kwetintfo kulemakethe kuze iNingizimu Afrika ibe nekumelelwa emakethe yemhlaba wonkhe ngetisetjentiswa letifakwako. Ngeke sitsenge kulamanye emave langephandle yonkhe imikhicito, kodvwa singakhona kukhicita kwetfu siphindze futsi sichudzelane nemabhizinisi emave emhlaba,” kwachaza yena njalo.

Kwekucala, lenkampani yacala ngebasunguli labane beluhlelokusebenta lwa-ngcondvoshini kodvwa kwanyalo seyingete basebenti bayo baba nge-20.

IKhoi Tech ililunga leProudly South African, yinkhundla Moloi lakholelwa ekutseni imcokela ibhizinisi ngobe iphindze futsi yenta kutsi kube nekufinyelela emamakethe lamasha. 

Kuze utfole lwatiso lolwengetiwe Vakashela ku: www.khoi.africa nome utfumele incwadzigezi ku: info@khoi.africa 

Telkom’s Future-Makers Programme ku: www.group.telkom.co.za/about-us/business-units

Utsi bewati-nje?

Mengameli Cyril Ramaphosa ucele kutsi kube netingucuko letiphutfumako tekususa imidanti lokumele ilandzelwe, wacwayisa ngekutsi kubambeleleka kwetinchubo, imitsetfo yamasipala ibambelela lutjalomali kanye nemabhizinisi asemalokishini. Ngesikhatsi akhuluma eNgcungcutseleni Yavelonkhe Yekutfutfukisa Umnotfo Wendzawo, Mengameli ubone kusalela emuva ekuphatseni njengesihibe sekucala lesivimba emabhizinisi lamancane kutsi afinyelele ekusekwelweni lokumcoka nguhulumende. Mengameli ucele kakhulu bohulumende bendzawo kutsi batsatse sincumo lesicinile, bente kutsi kube nekubambisana nemkhakha lotimele kuze kwakhiwe simondzawo lesivumako lesikhutsata emandla lagcinekile etebhizinisi aseNingizimu Afrika.