Incwadzi
Vuk’uzenzele Lotsandzekako,
Ngitsandza kuvakalisa kubonga kwami kuwe kanye nakulo lonkhe licembu leVuk’uzenzele ngelitfuba lenginikwe lona lekutsi ngivele elushicilelweni lwangaMabasa. Ngitiva ngihloniphekile sibili futsi lokuyintfo lengingayitsatsi nje malula leyo.
Kimi, kuvela elushicilelweni lwahulumende waseNingizimu Afrika kuyinkhomba lesho lokutsite — hhayi lemelele kuphela kuhlonishwa kwemsebenti wami, kodvwa kuyinchubombono yekusebentela imimango yetfu.
Kungitfobisa ngalokukhetsekile kutsi ngivele eceleni kwetikhulu tahulumende kanye nalabo labaletsa ingucuko labasebenta ngekutikhandla kugcina imigomosisekelo yeMtsetfosisekelo kanye neMculu Wenkhululeko. Lokuhambisana kucinisekisa kubaluleka kwemitamo lehlangene ekwakheni ummango lolingana kakhulu.
Ngalokubalulekile, kuvela kwami kuVuk’uzenzele sekuvele kwabeka lephrojekthi yami lenginayo esimeni lesifanele, iNourish & Grow, etindzaweni letinengi letinhle.
Sekuhehe inshisekelo kanye nekucocisana nematiko ahulumende lahlukahlukene, kwacinisa emandla kutsi kube nemtselela lohlanganyelwe.
Kwanyalo simatasatasa silinga kusebenta eSharpeville Community Learning Centre, lokuholwa yinkampani yami, iLetlotlo Permaculture Design, lapho sikhombisa khona kutsi tinhlelo tekudla letisimeme tingayisekela imfundvo, kudla lokunemsoco kanye nekutfutfukisa ummango.
Kunye lokugcamile kwalesipiliyoni kwaba litfuba lekucocisana naMore Matshediso, longasiyo kuphela ingcweti leyatiwako kodvwa ungumuntfu lofakana umdlandla sibili. Umsebenti wakhe kanye netindzaba latitekako tinemandla, futsi tiyachubeka nekungikhutsata kutsi ngichubekele embili neluhambo lwami.
Ngiyabonga futsi kumhleli kanye nakulo lonkhe nje licembu ngekutinikela kwenu ekutekeni tindzaba letinemtselela taseNingizimu Afrika. Umsebenti wenu usho lokukhulu, futsi wenta umehluko.
Ngimi lotitfobako,
Tshepang Mokoena
Imphendvulo
Tshepang Lotsandzekako,
Siyabonga incwadzi yakho losibhalele yona. Kuyajabulisa kuva kutsi kuvela kwakho elushicilelweni lwetfu lwangaMabasa sekuvulele iphrojekthi yeNourish & Grow iminyango futsi sekuvuse inshisekelo nakulamanye ematiko.
Lomsebenti lowentako lapha eLehaheng La Adullame Centre wekuchubela embili ummango waseWinterveld kutsi utimele ungiyo mbamba indzaba lenemtselela lesilwela kuyisho.
Sijabulile natsi kuva kutsi kubonana kwakho naMore Matshediso kwaba ngulokuhle.
Siyabonga kuba ngumholi kwakho lowetsembekile kanye nekutinikela kwakho ekutfutfukiseni ummango.
Sikufisela imphumelelo lechubekako wena nelicembu lakho ekucaleni kulinga umsebenti eSharpeville Centre.
Ngitsi labatitfobako,
Licembu leVuk’uzenzele
Email
Facebook
Twitter
WhatsApp