Yasha yangcongca, ibhizinisi ivukile

Ngesikhatsi baphangi batitapela imphahla babhubhisa ifekthri ya-Elaine Muthusamy eDurban ngesikhatsi setiphitsiphitsi tangaKholwane 2021, batsatsa sitoko semphahla netisetjentiswa letilinganiselwa etigidzini leti-R3.5. Labehluleka kukutsatsa kwaba sincumo lasitsatsa emalangeni lalandzela lawo. Bekangeke ayivale.

Muthusamy wacala i-SA Metering Solutions eDurban nga-2019 anembononchanti, intsandvo lecinile kanye nekwesekelwa yi-Ejensi Yekutfutfukisa Emabhizinisi Lamancane Ngetimali, leyatiwa kancono ngekutsi yi-Sedfa, leyamsita kutsi atfole sitoko sakhe sekucala futsi wacala kwetfula emamitha emanti emabhizinisi KwaZulu-Natal yonkhe. Ibhizinisi beyikhula kancane. Kwabeseke sebhedvuka letiphitsiphitsi.

“Inkampani yami yasha yangcongca, kodvwa angizange ngitibona ngisehluleki. Sengike ngancoba kugula ngaphambilini, ngako-ke ngiyati kutsi emandla ayintfo lenjani,” kwasho yena njalo Muthusamy.

Ngekushesha ngemuva kwalokuphangwa kwemphahla, wangenela u-mncintiswano wemsakato wazuza umklomelo wa-R20 000. Kwakusamba lesincane nakacatsanisa nebungako kwaloko lokwamlahlekela, kodvwa kwakumcoka. “Kukhetfwa kwami kwaba kukhanya lobekulotita kancane. Le-R20 000 yanginika litsemba.” 

Umgcinimabhuku wakhe wamgcugcutela kutsi alubhale phasi luhambo lwakhe lwebhizinisi lweminyaka lemibili legcwele bese leyo dokhumenti uyitfumela ka-Sedfa aphindze futsi akhokhele ngco kuhanjiswa kwemphahla emaveni emhlaba ngaphasi kweluhlelo lwekwesekela kuhhamleka etiphitsiphitsini.

I-Sedfa yavuma sigidzi le-R1,2 yemali yekusita lebhicene, leyi-R800 000 lokuyimalimboleko kantsi R400 000 yona iselekelelomali sahulumende. Njengaloku baphakeli bakhe bebase-Shayina, i-Sedfa yaphindza futsi yakhokhela ngco kuhanjiswa kwemphahla emaveni emhlaba.

Emakhasimende akhe alindza. Lamanengi akhetsa kutsi abambe ema-oda awo tinyanga kunekutsi aye kubachudzelani. Nakasavulile futsi, wabuyela emuva futsi emakethe lebeyimgcinele indzawo yakhe. I-SA Metering Solutions nyalo icasha bantfu labayimfica, labanengi babuya etindzaweni temimango yasemaphandleni lapho kunematfuba khona lanemkhawulo. Muthusamy uyabacecesha abacale phasi. “Ngemukela bantfu labete emakhono bese ngibanika litfuba lekutsi batetsembe bona,” kwacedzela yena njalo. 

Kuze utfole lwatiso lolubanti lolumayelana ne-Sedfa, vakashela ku: www.sedfa.org.za  

I-SA Metering Solutions kungafinyeleleka kuyo ku:  www.sametering.co.za